Nisma e fundit e Kryeministrit Rama për të kaluar sërish në varësi të Ministrisë së Mbrojtjes Spitalin e Traumës dhe Shërbimin e Emergjencave Civile, nuk është mirëpritur nga stafi mjekësor i këtij institucioni.
“Jemi në dijeni të një urdhri, ku kërkohet ngritja e grupit të punës, që do të plotësojë anën ligjore të draftit që do kalojë në fund të shtatorit në qeveri. Por rikalimi i Spitalit të Traumës në varësi të Ministrisë së Mbrojtjes ka pasoja. Pasi, duke qenë në varësi të Ministrisë së Shëndetësisë, gjatë periudhës 12-mujore kishte edhe rialokim apo shpërndarje fondesh nga Fondi i Sigurimit të Detyrueshëm të Kujdesit Shëndetësor për përballimin e emergjencave. Kjo gjë nuk ka për të ndodhur më nëse drejtimin e qendrës e rimerr Ministria e Mbrojtjes”, shprehet një prej mjekëve.
Kujtojmë që zhvendosja e kompetencave dhe kalimi në varësi të Ministrisë së Shëndetësisë i Spitalit të Traumës është bërë në 2012. Ndërsa, tri vite më pas, ka një tentativë për ta rikthyer Traumën sërish në Spital Ushtarak, në varësi të drejtpërdrejtë të Ministrisë së Mbrojtjes.
Mjekët vënë në dukje se kjo lëvizje ka qenë e menjëhershme, ndërkohë që pritet të ketë edhe një qëndrim zyrtar kundër ndaj kësaj nisme edhe nga drejtoria e spitalit. Bluzat e bardha vënë në dukje se përgjatë 20 viteve kur kjo qendër komandohej nga Mbrojtja, ka qenë e braktisur. Sipas tyre, ajo që nuk ishte bërë për 20 vite në spital, është arritur të ndërtohet përgjatë këtij trevjeçari të fundit. Ndaj një vendim i tillë nuk do të ishte vetëm një hap pas.
“Trauma është e kushtueshme, kjo për vetë faktin që përballon një numër të lartë pacientësh që shkojnë në rritje vit pas viti. Rreth 44 mijë aksidente çdo vit, të gjitha raste që referohen në spital. Ne do të kërkojmë që të shihet mundësia që të qëndrojmë me statusin që kemi si spital traume dhe në varësi të Ministrisë së Shëndetësisë”, thekson një tjetër mjek.
Paradoksi që ende vijon në këtë spital është që pavijone të ndryshme varen nga institucione të ndryshme, siç janë QSUT dhe Ministria e Mbrojtjes. Kjo, përveçse krijon çoroditje, reflektohet edhe në cilësinë e shërbimeve ndaj pacientëve.
ADA HAZIZOLLI
