Le ta nisim nga rezultati: Barazimi është i drejtë. Ndoshta i rri pak ngushtë Interit, por duhet të bënte më shumë në fushë. Sigurisht nëse Çalhanoglu… Ok, por edhe nëse Simeone… Nëse merremi me këtë diskutim, nuk do të dalim dot kurrë prej tij.

Atëherë le të analizojmë mënyrën si shkoi ndeshja dhe dritë-hijet që ka shfaqur skuadra e Interit. Nuk ka asnjë dyshim që pika është më e vlefshme për Napolin sesa për Interin. Konte u largua nga San Siro si kryesues dhe me konfirmimin që ka zbehur diferencën që ekziston me kampionët e Italisë.

Në pushimin e tretë të kampionatit nuk është pak. Axurrët kanë 5 pikë më shumë sesa viti i kaluar, ndërsa zikaltrit 6 më pak. Dhe një tjetër fakt shqetësues për të besuarit e Inzagit është fakti që në duelet direkte me Atalantën, Milanin, Juventusin dhe Napolin kanë arritur që të marrin vetëm 5 pikë. Dhe për këtë arsye zhgënjimi tek trajneri i Interit ishte më i madh pas përfundimit të ndeshjes dhe rasteve të shpërdoruara. Ndeshja në fakt ishte e luajtur mirë dhe e interpretuar mirë nga Interi.

Kampionët e Italisë pavarësisht se vinin nga sfida e mesjavës në Champions kanë reaguar me autoritet pavarësisht se pësuan golin e parë. Fizikisht ishin të freskët dhe rrezikuan pak mbrapa, me përjashtim të sekondës së fundit. Açerbi ka anuluar Lukakun dhe dyshet Pavar-Dumfris dhe Bastoni-Dimarko e bënë mirë detyrën e tyre. Për Çalhanoglunë çfarë mund të thuhet? Penalltia e humbur e zbeh golin e barazimit? Jo. Madje ai në mesfushë ishte busulla për skuadrën, më i kthjellët sesa Barela dhe më i saktë sesa Mkitarian. Kështu që notat jo kaluese janë për të tjerët:

Dy sulmuesit. Turam dukej i trembur ndërsa Lautaro Martinez luajti shumë larg zonës. Nuk është vetvetja dhe ka vështirësi në gjithçka që bën. Problemi është që kur të dy nuk funksionojnë atëherë Inzagi nuk ka alternativa të nivelit të tyre.

Taremi, përtej minutazhit që herë pas here merr, të jep akoma idenë që nuk është pjesë e këtij projekti. Edhe Arnautoviç shpesh ngel në klasë. Nëse në ndeshjen kundër Napolit ka një faktor që duhet theksuar është pikërisht ky. Dhe ta mendosh që ky është një problem jo i lehtë për t’u zgjidhur. Madje e kundërta.

PANORAMASPORT.AL

NDIQE LIVE "PANORAMA TV"

---