Interi i Simone Inzagit vazhdon rrugëtimin pozitiv edhe në Kupën e Italisë dhe nuk ka ndërmend që të vërë këmbën në gaz. Edhe në ndeshjen në “San Siro” kundër Udinezes, zikaltrit kanë arritur një sukses të pastë, edhe pse jo me goleadë si ai kundër Lacios.

Ekipi i Inzagit triumfoi pa e vënë kurrë në rrezik këtë ndeshje, mbi të gjitha duke pasur në fushën e lojës linjat e dyta: Nga Martinez te Bjukenën, duke kaluar tek Asllani dhe Arnautoviç, dy autorët e golave. Në 30 minutat e para ndonjë sinjal jo shumë pozitiv erdhi. Skuadra u duk jo aq fluide siç e ka mësuar publikun në vitet e fundit dhe ia la iniciativën kundërshtarit, pavarësisht se rrezikoi pak, ose aspak. Pastaj u fut në lojë edhe pak fati, ku Ekelenkamp i bëri një dhuratë Taremit. Nga ai moment deri në fundin e ndeshjes nuk pati më histori.

Sapo zhbllokuan rezultatin, zikaltrit gjetën ritmin dhe aksionet e rrjedhshme. Goli olimpik i Asllanit ishte kulmi i ndeshjes që i preku këmbët skuadrës së Runjaiç dhe e futi në shinat e duhura sfidën për zikaltrit. Në pjesën e dytë u fut edhe eksperienca e Interit që menaxhoi dhe kishte mundësi për ta goditur sërish kundërshtarin. Shtylla i mohoi golin e tretë Taremit, që do ta bënte rezultatin më të sigurt dhe të thellë. Megjithatë, për trajnerin Inzagi erdhën sinjale shumë pozitive dhe fjalët e tij në fundin e sfidës e konfirmuan këtë. Ai tha se ka 25 titullarë.

Kualitetet individuale të lojtarëve të stolit, sigurisht që nuk mund të jenë si ato të titullarëve. Kjo gjë vlen për dyshen e sulmit, për Asllanin, Bjukenën dhe Karlos Auguston, por skuadra nuk ndryshon kurrë filozofinë. Për momentin është një makineri që garanton soliditet dhe rezultate pozitive. Tek Interi ndryshojnë lojtarët, por jo stili, ndryshon orkestra, por jo muzika. Për momentin është duke kaluar një formë të jashtëzakonshme dhe trajneri shpreson që të vazhdojë kështu deri në fundin e këtij viti, për t’u rikthyer sërish.

PANORAMASPORT.AL

NDIQE LIVE "PANORAMA TV"

---