BASKET FEMRA/ Tirana e mbyll vitin me festë, “shtrin” Partizanin në derbi
Kategoria e Parë e basketbollit për femra ka zhvilluar javën e dhjetë, e cila ishte edhe java e fundit e kampionatit për vitin 2024.
Vëmendja kryesore ishte te derbi i kryeqytetit ndërmjet Tiranës dhe Partizanit, takim i zhvilluar pasditen e së shtunës në sallën “Farie Hoti”. Vajzat bardheblu festuan në shtëpinë e tyre, duke fituar me rezultatin e thellë 75-58.
Derbi nisi më mirë për Partizani, teksa të kuqet ishin më të sakta në minutat e para, duke shkuar deri në 8 pikë epërsi në shifrat 4-12. Por Tirana reagoi shpejt, ndërsa perioda e parë u mbyll në ekuilibër të plotë 19-19. Në çerekun e dytë skuadra e drejtuar nga Mirza Alibegaj u shfaq dominuese, duke e marrë periodën 21-9, për të shkuar në pushimin e madhe me avantazhin 40-28 në shifra të përgjithshme. Të kuqet e Eliverta Bujarit provojnë të afrohen në çerekun e tretë, por rikuperojnë vetëm 2 pikë, teksa e fitojnë periodën 13-15, ndërsa pas 30 minutash Tirana udhëheq 53-43. Skuadra bardheblu vulos gjithçka në periodën e katërt, ku triumfon 22-15 dhe e mbyll derbin me +17 pikë diferencë.
Kështu Tirana fiton edhe derbin e dytë sezonal kundër Partizanit, duke e përfunduar vitin në vendin e parë, por ka një takim më shumë sesa Flamurtari i vendit të dytë. Emani Clough u shpall MVP në derbi, duke regjistruar 25 pikë, 14 kërcime dhe 8 asistime, mbështetur nga Enisa Qosja me 19 pikë. Për të kuqet nuk mjaftoi Jenna Dick, autore e 22 pikëve. Në takimin përmbyllës të javës, Vllaznia fitoi dje kundër Elbasanit në Shkodër me rezultatin 60-44 (16- 11, 20-16, 7-9, 17-8).
Një ndeshje e kontrolluar në të gjitha periodat nga vajzat kuqeblu, ku spikatën Bernarda Rreshpja me 18 pikë, 9 kërcime dhe 9 asistime si dhe Anisa Bokrina me 15 pikë e 7 asistime. Për ekipin elbasanas u dallua Dae Sali, autore e 16 pikëve. Kujtojmë që java e dhjetë u hap të premten me fitoren e Teutës kundër Studentit në kryeqytet në shifrat 67-75.
PANORAMASPORT.AL
