Ndeshja e radhës për Teutën është ndaj Egantias. Në një intervistë për “Panorama Sport” ka folur mesfushori i Teutës, Ledio Beqja, i cili ka analizuar këtë takim. Mesfushori shprehet se Teuta pas fitores ndaj Tiranës, do të kërkojë dhe në këtë duel tri pikët. Lojtari i bluve shprehet se në këto momente nuk duhet parë fare renditja, por t’i marrin ndeshjet një nga një dhe llogaritë të bëhen në javën e fundit.

Pas asaj fitoreje ndaj Tiranës, si ndiheni? Normalisht që fitorja ndaj Tiranës, si fillim na shërbeu shumë nga ana psikologjike, për më tepër që zhvilluam një ndeshje të mirë. Dhe për fat të mirë arritëm të fitonim, por do të shohim përpara, sepse kemi një kalendar të ngjeshur. Kjo na bëri që ta përgatisnim ndeshjen ndaj Egantias me të qetë dhe shpresoj që të vazhdojmë me ketë ritëm.

Ledio, a është gati Teuta për duelin ndaj Egnatian? Do të shkojmë në Rrogozhinë për të bërë një ndeshje të mirë dhe për të kërkuar pikët, sepse po kërkojmë të ruajmë vazhdimësinë e ndeshjeve të fundit, dhe do të kërkojmë pikët për të arritur objektivin tonë. Kështu që e gjithë skuadra është përgatitur për të marrë pikë dhe e dimë që është një ndeshje e rëndësishme dhe për këtë jemi gati. A mund të themi që vazhdimësia e Teutës varet nga tri ndeshjet e ardhshme Egnatia, Bylisi dhe Partizani? Duhet ta kuptojmë që është një ndeshje e fortë dhe të gjithë çunat e dinë. Duhet të kalojmë nga kjo ndeshje për të shkuar te tjetra. Duhet të jemi 100% të përqendruar në grup dhe pastaj të mendojmë për ndeshjen e radhës. Siç kemi bërë gjithmonë, por besoj se të gjithë që janë në këtë skuadër do të japin maksimumin e tyre.

Cili është çelësi i suksesit që kjo Teutë ka shumë harmoni brenda saj? Ne jemi një ekip që kemi ecur përpara si grup dhe do të ecim si grup. Nuk kemi një lojtar që na bën ta humbasim apo ta fitojmë ndeshjen. Duhet të jemi të përqendruar. Kemi kualitet, si përpara si prapa, për të bërë më shumë, për të bërë rezultat dhe ta mbrojmë rezultatin. Vlerat tona i dimë dhe shpresoj që sot t’i tregojmë.

Cilat janë objektivat e Teutës këtë sezon? Qëllimi primar është përmirësimi dhe deri tani ia kemi dalë me sukses. Duhet t’i marrim ndeshjet me radhë e të fitojmë sa më shumë prej tyre. Llogaritë në fund të sezonit do të na tregojnë se çfarë kemi arritur.

ZAMIR QYPI-PANORAMASPORT.AL

NDIQE LIVE "PANORAMA TV"

---