Mjedisi futbollistik në Kavajë, ka ditë që është i ndezur. Pas festës së 99-të vjetorit, punimeve për stadiumin e ri, ishte edhe fitorja e thellë e kavajasve ndaj Kukësit. Fitorja 5-0 ndaj kuksianëve ka krijuar një klimë besimi të rëndësishme për skuadrën e Mirel Josës në prag të sfidës me Flamurtarin.

Edhe pse trajneri e lojtarët e quajnë detyrë të kryer mirë rezultatin e thellë ndaj Kukësit, këtë radhë duke pasur përballë Flamurtarin, kavajasit janë përqendruar tashme për një tjetër fitore të martën në Rrogozhinë. Besa e ka të qartë se do të jetë përballë një skuadre që luan një futboll të mirë. Vlonjatët nuk parkojnë autobusin në prapavijën e tyre, pasi të lejojnë të luash. Duke ditur se vlonjatët të japin shansin të luash e provosh shanset, po aq edhe të ndëshkojnë kur nuk je i vëmendshëm.

Të gjithë e quajnë përballje elitare sfidën Besa–Flamurtari. Do ndeshen dy skuadra me emër, traditë e histori të madhe në Superiore. Kërkesat e pretendimet e të dy ekipeve për t’u ngjitur, më saktë rikthyer në elitë në fund të këtij sezoni, mund të kenë një ndikim sado të vogël edhe nga përfundimi i kësaj ndeshje. Do të jetë një ditë festive, saktësojnë sportdashësit e Besës, që mezi presin të ndjekin e mbështesin fort skuadrën e tyre verdhezi, të martën ora 14:00 në “Egnatia Arena”.

STATISTIKAT- Në Kategorinë e Parë, ku luajnë aktualisht Besa e Flamurtari janë takuar 9 herë mes tyre. 5 fitore ka Besa, 1 barazim dhe 3 fitore Flamurtari. Golavarazhi është 14-8 në favor të Besës. Ndërkohë, duke u kthyer pak prapa, kur së bashku kanë luajtur për herë të fundit në elitë kundër njëra–tjetrës, sërish duket e qartë epërsia e Besës ndaj Flamurtarit në statistika. Konkretisht, në sezonin 2013-2014, kavajasit i fituan të tria ndeshjet direkt.

Në Kavajë për fazën e parë dhe atë të tretë, respektivisht 2-0 dhe 3-1 ndërsa në fazën e dytë në Vlorë, Besa fitoi edhe më thellë në stadiumin “Flamurtari” 4-1. Në total, në Kategorinë Superiore, në 131 ndeshje, Besa numëron 59 fitore, barazime janë 33, ndërsa Flamurtari ka fituar 39 ndeshje. Edhe golavarazhi 158 me 124 flet për kavajasit. Kjo histori në shifra e statistika, duket paraprakisht se është një aleat i rëndësishëm për ta përjetuar sfidën e së martës me motivim e optimizëm real nga Besa, e cila kërkon medoemos fitoren.

FERIZ FERIZAJ- PANORAMASPORT.AL

NDIQE LIVE "PANORAMA TV"

---