Burreli do të pres sot, në stadiumin “Liri Ballabani”, skuadrën e Valbonës. Fitorja e arritur në transfertën e Vlorës ka krijuar klimë optimiste në radhët e matjanëve, prandaj presin ta kalojmë me sukses edhe Valbonën.

“E nisëm me një fitore në Vlorë kundër Flamurtarit dhe sot ndaj Valbonës presim tri pikët e radhës”, u shpreh fillimisht trajneri Ditmar Bicaj për “Panorama Sport”. Luhet para publikut vendës dhe vlerësimi mbetet maksimal nga Burreli.

“Pavarësisht se vijmë nga një fitore me shumë vlera kundër Flamurtarit dhe Valbona pas humbjes në shtëpi me Besën, vlerësimi duhet të jetë në shkallën maksimale. Që të arrish objektivin e duhur, duhet që fillimisht detyrat e shtëpisë t’i realizojmë me përpikëri.

Jam optimist që sfidën e sotme do ta kalojmë me sukses”, e mbylli Bicaj. Burreli do të zbresë në fushën e lojës pa mungesa dhe ka të ngjarë që me Valbonën të startojë formacioni që triumfoi në Vlorë. Merkatoja e verës konsiderohet e mbyllur në kampin matjan, kështu që në orët e mbetura të këtij procesi nuk priten afrime të tjera.

NDERIM GOCI – PANORAMASPORT.AL

NDIQE LIVE "PANORAMA TV"

---