Një nga sfidat më interesante të javës së 9-të të Superiores, që mbyll fazën e parë, është ajo mes Egnatias dhe Teutës. Përballen dy ekipe që vijnë në një moment të mirë, pas fitoreve respektivisht ndaj Skënderbeut dhe Tiranës.

Sigurisht, morali është më i lartë në kampin durrsak. Teuta i ka shkaktuar humbjen e parë Tiranës dhe qëndron në pozita të mira në klasifikim. Tani “Djemtë e detit” kërkojnë edhe “kokën” e Egnatias dhe ndaj këtij kundërshtari kanë një histori goxha të mirë.

MAKTH PËR KAMPIONËT – Egnatia kampione në fuqi ka dominuar sezonet e fundit ndaj të gjitha skuadrave, por jo ndaj Teutës. I vetmi kundërshtar që rrogozhinasit nuk ia kanë dalë ta mposhtin vitet e fundit është pikërisht skuadra e drejtuar nga trajneri Edi Martini.

Nga 10 sfidat e fundit mes këtyre dy ekipeve, Teuta ka fituar 6 herë, 3 ndeshje kanë përfunduar në barazim dhe vetëm një herë ka fituar Egnatia. Kjo ka ndodhur në dhjetorin e vitit 2021 dhe që atëherë rrogozhinasit e kanë pasur “mollë të ndaluar” fitoren ndaj durrsakëve.

Një bilanc pozitiv për bregdetarët, të cilët kanë kështu edhe një “aleat” tjetër për fundjavën e ardhshme, statistikat. Megjithatë, ndeshjen e fiton skuadra në fushë dhe jo numrat dhe historia. Pritet që këtë herë të jetë një duel shumë i luftuar, pasi të dyja skuadrat kanë pretendime për të ngjitur shkallët në tabelën e klasifikimit.

GJENDJA – Për ndeshjen me Egnatian trajneri Edi Martini ka ndonjë dilemë për mesfushën, ndërsa sulmi dhe prapavija nuk ndryshojnë nga ndeshja e fundit. Vila, Lloci dhe Beqja kanë vendin e tyre në formacion dhe dilema e trajnerit shkodran është njëri mes Torrajt dhe Arifit për të plotësuar mesfushën.

Deri në sfidën me kampionët në fuqi ka ende shumë ditë kohë, kështu që gjithçka do të shihet me qetësi. Stërvitja ka vazhduar normalisht për durrsakët, ku kanë munguar Toma dhe Torraj, të grumbulluar me Kombëtaren U-21. Me grupin është bashkuar dhe Cyrbja, i cili mund të jetë gati për përballjen e radhës.

ZAMIR QYPI – PANORAMASPORT.AL

NDIQE LIVE "PANORAMA TV"

---