Naftëtari ka pësuar një tronditje në prag të ndeshjes së javës së pestë në kampionat. Trajneri Barjam Fraholli ka dhënë dorëheqjen para ndeshjes me Adriatikun. Ai e mori ekipin kuçovar tri javë përpara fillimit të kampionatit duke shpalosur objektivin për një Naftëtar pretendent, por ecuria në katër javët e para ishte larg pritshmërive.

Në katër javë kuçovarët kanë marrë 4 pikë, me 1 fitore, 1 barazim dhe dy humbje. Pikërisht kjo ecuri jo e mirë e ka detyruar teknikut 57-vjeçar që të japë dorëheqjen nga drejtimi i kuçovarëve. Menjëherë pas tërheqjes së tij, drejtuesit nuk kanë humbur kohë, por kanë gjetur pasuesin e tij. Ai do të jetë Saimir Gega, që do të ketë si ndihmës Endri Koroveshin.

Të dy janë ish-futbollistë të Naftëtarit. Madje, zv.trajneri Koroveshi aktivizohet edhe si futbollist këtë sezon. Ata kanë nisur menjëherë nga puna për përgatitjen e ndeshjes së radhës. Ndaj Adriatikut, në “Bashkim Sulejmani”, do të kërkohet vetëm fitorja.

ARBEN ÇEPANI- PANORAMASPORT.AL

NDIQE LIVE "PANORAMA TV"

---