Nga Bylisi, te Bylisi. Elbasani e sheh ndeshjen e sotme si shpëtim, për t’i dhënë fund ecurisë së gjatë pa humbje, ku për herë të fundit kanë mundur pikërisht mallakastriotët. Në prononcimin e dhënë për mediat para ndeshjes, trajneri Roberto Bordin, kërkon të shihet përpara, me synimin që lojërat e mira tani të përkthehen me tri pikët.

“E dimë shumë mirë që prej kohësh nuk kemi fituar. Kjo është evidente dhe nuk mund ta anashkalojmë, megjithatë nuk duhet të shikojmë prapa, por përpara. E ardhmja është që ne të fitojmë nesër (sot) me Bylisin. Siç e kam thënë edhe herët e tjera, kemi zhvilluar lojëra të mira dhe me raste për gol, por duhet të jemi më të saktë para portës. Janë disa raste që duhet t’i fshijmë për të ardhmen dhe të mësojmë si në fazën sulmuese për të sulmuar, por edhe në fazën mbrojtëse për t’u mbrojtur”, u shpreh fillimisht tekniku i Elbasanit.

OBJEKTIVI – Në lidhje me faktin se sa e rëndësishme është fitorja për të mbajtur gjallë shpresat për “Final 4”, italiani pohoi se kampionati është shumë i gjatë. Sipas tij, për momentin rëndësi ka vetëm fitorja, pa menduar për objektiva. “Gjëja kryesore dhe më e rëndësishmja është që ne të fitojmë këtë ndeshje. Nuk mendoj që në këtë fazë të kampionatit skuadrat të mendojnë për kupat e Europës apo objektivat, pasi ka shumë kampionat para. Më e rëndësishmja është të kthejmë rezultatin në favorin tonë, të kthejmë rezultatin që kishim në fillim, besimin në skuadër dhe kjo është më e rëndësishme”, vijoi më tej Roberto Bordin, duke mos e cilësuar si vendimtare për fatet e kampionatit.

TIFOZËT – Në fund, Bordin u ndal pak edhe tek tifozët, që përpos zhgënjimit nuk e kanë braktisur skuadrën. “Është evidente dhe tifozët na kanë ndjekur dhe na kanë mbështetur në çdo ndeshje, duke na dhënë një shtysë tepër të madhe gjatë lojës. Edhe ne si tifozët, nuk jemi të lumtur me situatën që është krijuar për momentin. E kuptoj që entuziazmi ka rënë, nuk është si në ndeshjet e para. Ata na kanë mbështetur në çdo moment, duke parë dhe ndeshjen e fundit me Egnatian, ku djemtë vajtën dhe përshëndetën tifozët dhe ata na duartrokitën, ndonëse jemi në një situatë shumë të vështirë. Djemtë e dinë shumë mirë dhe rëndësinë e tifozëve të ekipit dhe vlen shumë raporti që skuadra ka me tifozët, pasi ata na kanë mbështetur në çdo moment”, mbylli prononcimin e tij tekniku italian i Elbasanit, Roberto Bordin.

VLADIMIR MEMA-PANORAMASPORT.AL

NDIQE LIVE "PANORAMA TV"

---