Goli i shënuar në ndeshjen ndaj Dinamos ishte i pari për Foti Çuçkën me fanellën e Skënderbeut. Një gol i rëndësishëm për rezultatin e atij takimi dhe personalisht për sulmuesin që u aktivizua nga minuta e parë. 

Lojtari 21- vjeçar thekson në një prononcim për “Panorama Sport” se me pak kujdes Skënderbeu mund ta kishte fituar ndeshjen e fundit.

“Atë ndeshje e kishim përgatitur mirë dhe besoj se kemi pasur mundësi ta administronim më mirë avantazhin. E nisëm në disavantazh dhe reaguam menjëherë, çka tregon se ekipi është dhe nuk ka asnjë ngërç nga ana psikologjike.

E përmbysëm rezultatin që në pjesën e parë, madje mund ta kishim mbyllur ndeshjen më shpejt, nëse do të tregoheshim më oportunistë dhe të përqendruar në disa momente. Pësuam dy gola që mund t’i kishim evituar, mendoj se kishim mundësi të merrnim tri pikët. Megjithatë, edhe barazimi ka vlerë përballë Dinamos, ndërsa tani na del për detyrë të kalojmë me sukses ndeshjen e radhës me Laçin, që do të jetë po aq e vështirë”, tha fillimisht Çuçka.

GOLI – Më tej sulmuesi korçar tregon emocionet për golin e parë në Superiore me fanellën e Skënderbeut: “Kam nisur të punoj fort që ditën e parë që jam këtu dhe më në fund e gjeta rrugën e rrjetës. Jam i lumtur, pasi për një sulmues goli është shumë i rëndësishëm. Shpresoj të mos jetë i vetmi gol dhe po ashtu të kem sa më shumë mundësi e minuta në vazhdim. Do të isha më i lumtur në fakt, nëse ekipi do të fitonte. Do ta shijoja më shumë golin”.

ËNDRRAT – Për objektivat individualë dhe ëndrrat e së ardhmes futbollisti korçar është shprehur se nuk do që të shpërqendrohet nga Skënderbeu. “Jam në një ekip të madh si Skënderbeu dhe kjo për mua ishte një ëndërr. Ndihem shumë mirë këtu dhe po mundohem të rris akoma më shumë nivelin tim.

Më pas të shohim se çfarë do të ndodhë. Për momentin jam i përqendruar këtu dhe do të jap maksimumin me këtë fanellë”, ka përfunduar Foti Çuçka. Në fundjavë korçarët luajnë me Laçin në transfertë, ku shpresojnë për rikthimin te fitorja e munguar prej disa javësh. Është në sfidë mes rivalësh direkt, ku fitorja do të kishte vlera të dyfishta, por po ashtu e rëndësishme është që skuadra e Gvozdenoviç të mos humbasë.

LLAZI SARO-PANORAMASPORT.AL

NDIQE LIVE "PANORAMA TV"

---