EKSKLUZIVE/ “Tirana duhej mposhtur”, Ardit Hila: Nuk mund të gaboja, tifozët parashikuan golin (E PLOTË)
Ardit Hila i shënon ish-skuadrës së tij, Tiranës, por nuk i jep dot fitoren skuadrës së tij me atë penallti të shndërruar në gol.
Pas ndeshjes për “Panorama Sport”, mesfushori elbasanas i kënaqet grintës dhe lojës, por kishte besim se do të dilnin me tri pikë. Hila ia kishte premtuar golin një tifozi, ndaj edhe shkoi festoi me ta, ndërsa theksoi se nuk i munguan emocionet nga 11 metrat. Elbasanasi ka besim se lojërat e mira që po bëjnë do t’i rikthejnë drejt fitoreve, e cila shpreson që të vijë që këtë javë ndaj Egnatias në transfertë.
Shënoni, por Elbasani sërish nuk fiton. Sa keq ju vjen?
Na vjen keq, sepse kemi zhvilluar një lojë të mirë dhe kemi pasur rastet tona. Në një kohë që kundërshtari nuk na goditi asnjëherë. E donim një fitore përballë publikut tonë, por për fat të keq nuk erdhi.
Patët emocione te penalltia, duke qenë se Elbasani i pati humbur dy të parat?
Normalisht, duke parë sesi po shkonte ndeshja më kapën emocionet. Për më tepër ishim përballë publikut dhe nuk mund të gaboja. Më vjen mirë që shënova, por nga ana tjetër nuk i dhashë dot fitoren skuadrës dhe për këtë më vjen keq.
Ju pamë që shkuat festuat me një pjesë të tifozerisë, ishte një premtim i mbajtur nga ju?
Po, shkova të festoja te një nga tifozët që më pat thënë më herët që do të shënoja dhe unë ia premtova. Ky gol i dedikohet atij, por normalisht edhe gjithë tifozerisë së Elbasanit që sot (dje) ishte më e zjarrtë se kurrë.
Megjithatë, shkoni në shtatë ndeshje pa fitore. Çfarë ju mungon?
Duhet të jemi më cinikë në mundësitë që na krijohen, sepse rastet i kemi pasur. Na kënaq për momentin reagimi që kemi pasur dhe besoj se fitoret do të vijnë, sepse ekipi prodhon dhe ka dëshirë për të shkuar te fitorja.
Javën tjetër luani me Egnatian, si e prisni?
Kampionati sa vjen edhe bëhet më i vështirë, sepse edhe ekipet konsolidohen me kalimin e javëve. Ne kemi paksa presionin e pikëve dhe fitores dhe do të përpiqemi të marrim maksimumin e mundshëm. Nuk do të jetë e lehtë, por do të shkojmë për të fituar.
VLADIMIR MEMA-PANORAMASPORT.AL
NDIQE LIVE "PANORAMA TV"
