Është sezoni i tij i dytë si titullar te Vllaznia, duke qenë një nga protagonistët e skuadrës kuqeblu.

Gardiani shkodran, Kristi Qarri, ka folur në një intervistë për “Panorama Sport” në lidhje me kampionatin dhe ecurinë e skuadrës së tij. Portieri është ndalur tek performanca e ekipit në tërësi, por edhe ajo individuale. Po ashtu 23-vjeçari tregon edhe se kush është sulmuesi më i fortë i Superiores, sipas tij.

Qarri, një Vllazni e pandalshme në fazën e dytë. Çfarë ka ndryshuar te skuadra?
Unë besoj se kemi bërë mirë edhe në fazën e parë, sepse jo më kot jemi në krye të kampionatit. Dhe besoj se jemi aty plot meritë dhe me pikë të fituara në fushë. Por ndoshta në disa ndeshje jemi ndëshkuar në fund, duke humbur pikë të rëndësishme. Megjithatë, ne po punojmë që të përmirësohemi nga ndeshja në ndeshje.

Sa e rëndësishme ishte që skuadra të mos pësonte në ndeshjen kundër Skënderbeut?
Pavarësisht fitores, që në bazë të rezultatit duket e thjeshtë, duhet thënë se Skënderbeu ka një fazë sulmuese të rrezikshme. E aftë të vërë në vështirësi çdo skuadër dhe çdo mbrojtje të skuadrave të Kategorisë Superiore. Por ne bëmë një fazë shumë të mirë mbrojtëse e po ashtu edhe dy golat e shënuar që na dhanë pikët e plota.

Tashmë 2 vite si titullar i ekipit, e ndjeni më tepër peshën e përgjegjësisë?
Ka qenë gjithmonë ëndrra ime dhe e çdo lojtari që merret me futboll në Shkodër besoj. Luaj për qytetin tim dhe skuadrën time të zemrës. Emocioni është shumë i madh, këtu e kam fjalën për emocion pozitiv, që të mbush me krenari, por edhe përgjegjësi shumë të madhe, pasi duhet të mbrosh portën e një prej ekipeve më të mëdha në Shqipëri.

Garanton Qarri se porta do të jetë e paprekur në ndeshjet e ardhshme?
Unë personalisht stërvitem me dedikim dhe në çdo ndeshje përpiqem që ta mbaj portën e paprekur. Është një ndjenjë e veçantë për një portier që të mos pësojë gol. Megjithatë, e rëndësishme është performanca e skuadrës në përgjithësi dhe marrja e fitoreve në çdo takim, me qëllim për të siguruar kreun dhe për ta mbajtur deri në fund.

Cili është një kundërshtar apo sulmues që iu ka vënë më tepër në vështirësi?
Ka shumë sulmues të mirë në kampionat dhe çdo kundërshtar ka cilësi individuale. Por duke pasur Balajn në skuadër, kërkoj që çdo stërvitje të jem kundër tij. Kjo, sepse sulmuesin më të rrezikshëm të Superiores e kam në ekip dhe kjo më bën edhe të përmirësohem.

Deri ku premton kjo Vllazni?
Ne duhet t’i marrim ndeshjet me radhë. Çdo kundërshtar ka vlera dhe duhet të jemi të fokusuar në çdo moment. Besoj se duke vlerësuar çdo situatë mund të shkojmë larg këtë sezon.

Cili është synimi në ndeshjen e radhës kundër Egnatias?
Egnatia është ekipi kampion në fuqi i vendit. Ne i dimë cilësitë dhe vlerat që ata kanë. Edhe në këtë sezon ata kanë ekip shumë të mirë, por ne po punojmë fort që të shtunën të kthehemi me 3 pikë nga Rrogozhina.

ENDRI ÇINARI-PANORAMASPORT.AL

NDIQE LIVE "PANORAMA TV"

---