Erzeni ka mbledhur forcat pas eliminimit nga Kupa, ku përballë kishin Dinamon, dhe po përgatiten për sfidën e së dielës ndaj Besës. Trajneri Ergys Luga, në prononcimin e dhënë për “Panorama Sport” theksoi, se skuadra do të jetë gati, si dhe ende beson te kthesa e Erzenit.

“I dimë vështirësitë e ndeshjes me Besën, por jemi të përqendruar për të dhënë më të mirën. Çunat kanë qenë të motivuar gjatë programit stërvitore, edhe pse me pak ditë në dispozicion. Eliminimi nga Kupa? Jemi ekip i Kategorisë së Parë, u munduam t’i ulnim ritmin me faulle taktik, por që duhej t’i kishim bërë më lart këto faulle. Ekipi e pësoi nga shpejtësia e Dinamos.

Mua më ka pëlqyer gjithmonë skuadra ime nga ana e përkushtimit dhe fazës defensive. Jemi penalizuar nga gabimet individuale dhe uroj që ndeshjen me Besën t’i minimizojmë. Po flasim me djemtë dhe po mundohemi si staf që të punojmë që t’i rrisim qëndrueshmërinë psiko-fizike. Seria e humbjeve? Ekipi ka qenë i pafat, sepse fitorja e parë duhej të vinte që në ndeshjen time debutuese me Besën në fazën e parë, por nuk shkoi më shumë se një barazim”, u shpreh fillimisht trajneri i Erzenit.

Pyetjes se a mund të mbijetojë Erzeni dhe a do të ketë afrime në merkato, trajneri Luga u përgjigj: “Futbolli është i paparashikueshëm. Sot mund të jesh në një situatë të vështirë, nesër mund të jetë situata më e mirë. Mendoj se frytet e punës si trajner, kësaj skuadre ia kam marrë. Gëzoi një mbështetje shumë të mirë nga lojtarët, drejtuesit dhe tifozët. Shpresa vdes e fundit. Kemi shumë lojtarë të rinj në skuadër dhe mosha mesatare është 20.5 vjeç. Për merkaton nuk kam asnjë përgjigje për momentin, duhet të flisni me drejtuesit e klubit”.

ALBERT ALIKO – PANORAMASPORT.AL

NDIQE LIVE "PANORAMA TV"

---