“Fitorja me Vorën erdhi në momentin e duhur”, portieri Bushi: Apolonia ka shanse reale për Superioren
Fierakët e nisën mbarë fazën e dytë, ku mposhtën Vorën në shifrat 2-0 në stadiumin “Loni Papuçiu”. Pas 12 javëve, Apolonia ndodhet në vendin e gjashtë me pikë të barabarta me Lushnjën dhe Pogradecin.
Në një intervistë për “Panorama Sport”, portieri Aldo Bushi, që luan sezonin e tretë radhazi te Apolonia deklaron se, skuadra do të luajë vetëm për fitoren dhe kualifikimin.
Ju erdhi keq që pauza e kampionatit erdhi pikërisht në momentin që Apolonia mundi Vorën pretendente?
Fitorja me Vorën ishte shumë e rëndësishme dhe mendoj se erdhi në momentin e duhur, duke qenë se sapo nisi faza e dytë. Pikërisht fazën e dytë e kemi nisur me këmbën e mbarë. Duhet të shohim përpara. Kemi ende shumë punë për të bërë. Nga ana tjetër, ekipi ka pasur shumë nevojë për një pauzë të tillë, duke qenë se kalendari ka qenë i ngjeshur, me disa ndeshje të vështira të zhvilluara brenda pak ditësh.
Sa i kanë shërbyer Apolonisë këto ditë pushimi për të përgatitur ndeshjen në kupë ndaj Burrelit?
Këto ditë pushimi na kanë ndihmuar jashtëzakonisht, veçanërisht në fazën e rikuperimit të energjive të humbura. Na duheshin këto ditë edhe për t’u përgatitur mirë nga ana taktike. Jemi përgatitur shumë mirë. Duhet që të bëjmë maksimumin.
Nesër vlen vetëm fitorja dhe kualifikimi?
Do të luajmë vetëm për fitoren dhe kualifikimin në turin tjetër. Kupa ka marrë vlerësimin tonë dhe duam të ecim sa më gjatë në këtë kompeticion, si një mundësi e mirë për të vijuar serinë e rezultateve pozitive në kampionat. Kupa është thelbësore, po aq sa kampionati.
Si e shihni vazhdimësinë e ekipit?
Ekipi ka entuziazëm, ka punuar i qetë dhe i përqendruar gjatë këtyre ditëve për të marrë maksimumin, si në Kupë edhe në kampionat. Pra, Apolonia do të synojë të dalë fitimtare në dy sfidat e radhës që luhen këtë javë. Duhet të shohim në mënyrë pragmatike nga ndeshja në ndeshje. Nesër na pret një ndeshje e vështirë me Burrelin, ku patjetër do të kërkojmë të marrim më të mirën.
Sa larg mund të shkojë kjo Apoloni?
Nëse do të jemi maksimalisht të angazhuar dhe nëse punojmë me veten më shumë, mendoj se kemi shanse të mira për të arritur objektivin madhor, ngjitjen direkt në Superiore. Besoj se mund t’ia dalim dhe se gjithçka varet nga ne. Ka ende shumë garë, veç me punë do të mundohemi ta arrijmë.
HILMI SALIU- PANORAMASPORT.AL
NDIQE LIVE "PANORAMA TV"
