Alen Sherri është vlerësuar si lojtari më i mirë i ndeshjes Kaljari – Kremonese(1-0), e vlefshme për fazën 1/16 të Kupës së Italisë. “Sofascore” që mbledh të dhënat e lojtarëve gjatë ndeshjes, e vlerëson 7.9 portierin shqiptar të Kaljarit, pikërisht dhe me notën më të lartë.

Në ndeshjen debutuese me Kaljarin, Sherri i luajti të gjitha minutat. Pati 31 prekje të topit gjatë kësaj kohe, ndërsa pasimet e sakta ishin 14 nga 20.

Topa të gjatë që u nisën nga Sherri dhe u shfrytëzuan për aksione nga Kaljari u regjistruan 7. 26-vjeçari ndërkohë spikati më së shumti me 5 pritjet e tij ku 2 ishin brenda zonës.

Një tjetër spastrim në zonë ishte meritë e Sherrit, që e nis kështu me këmbën e mbarë pasi klubi i tij është kualifikuar në fazën e 1/8. Vlen për t’u theksuar se Lapadula shënoi në minutën e 60-të për Kaljarin në një ndeshje që përgjithësisht u dominua nga vendasit.

Siguria e ish-gardianit të Egnatias në këtë takim me eleminim direkt është pikërisht prezantimi që i nevojitej. Kujtojmë dhe që takimin e radhës Kaljari e luan në Seria A përballë Parmës në transfertë.

PANORAMASPORT.AL

NDIQE LIVE "PANORAMA TV"

---