Gjashtë ndryshime në listën e Kombëtares, ja si mund të luajë Shqipëria në dy ndeshjet e radhës
Kombëtarja po përgatitet të vijojë rrugëtimin e saj në Ligën e Kombeve, aty ku do të kërkojë të marrë maksimumin dhe pse jo të tentojë të ngjitet një ligë më sipër.
Por, për të arritur diçka të tillë, fillimisht duhet të merren rezultatet pozitive në dy ndeshjet e radhës, me Çekinë dhe Gjeorgjinë, të dyja në transfertë. Ditën e djeshme, Silvinjo shpalli edhe listën e lojtarëve që do të ketë të disponueshëm për këto ndeshje, një listë me 6 ndryshime nga muaji i kaluar. Duke nisur nga porta, Elhan Kastrati është rikthyer në vendin e Simon Simonit, ndërsa Sherri dhe Strakosha janë dy portierët e tjerë.
Mbrojtja ka shtuar forcat me Arlind Ajetin, ndërsa repartin e plotësojnë: Ismajli, Kumbulla, Gjimshiti, Mihaj, Hysaj, Balliu, Mitaj dhe Hadroj. Ndërkohë për Adrian Bajramin këtë herë nuk kishte hapësirë. Në mesfushë, mungon Medon Berisha për shkak dëmtimi, ndërsa është thirrur për herë të parë Adrion Pajaziti. Po ashtu rikthehet Ernest Muçi. Në anën tjetër Agim Zeka dhe Sebastjan Spahiu nuk kanë kaluar “klasën” dhe nuk janë ftuar për sfidat me Çekinë dhe Gjeorgjinë, “eksperimente” që rezultuan pa sukses me sulmuesit e Superiores, teksa tashmë Spahiu luan në Iranin e largët. Sulmi sheh Dakun, Uzunin dhe Seferin, në mungesë të Brojës dhe Manajt i cili nuk u rikuperua në kohë.
FORMACIONI- Pas më shumë se një viti e gjysmë, tashmë të gjithë jemi mësuar me zgjedhjet e trajnerit Silvinjo, i cili i beson vetëm një grupi me 13-14 lojtarë dhe për ndeshjen e radhës, nuk është se ka shumë dilema për formacionin titullar, të paktën duke llogaritur se të gjithë futbollistët do të jenë në gjendje optimale.
Portën braziliani ia beson Strakoshës, ndërsa në mbrojtje nëse Gjimshiti kalon shqetësimet, pritet të luajë me Ismajlin i cili po kalon një formë shumë të mirë. Nëse kapiteni nuk ia del, atëherë Kumbulla është nga minuta e parë. Nga e djathta pritet Hysaj dhe e majta Mitaj. Në mesfushë mendohet Ramadani, Asllani dhe Laçi i cili ka zënë vend me meritë në formacion gjatë ndeshjeve të fundit. Ndërkohë në treshen përpara, Nedim Bajrami, Jasir Asani dhe Mirlind Daku.
KRISTI SEJATLLARI-PANORAMASPORT.AL
