Pep Guardiola pohoi se asnjë mbrojtës në futbollin botëror nuk mund të pengojë Erling Halandin e pandalshëm pas dy tripletash të njëpasnjëshme në Premier Ligë. Norvegjezi shënoi tre gola të tjerë kundër Uest Hemit, të cilët ruajtën startin perfekt të kampionëve, me trajnerin që pranoi se është i befasuar me nisjen e sezonit nga skuadra e tij.

Haland ka shënuar 7 gola në kampionat deri tani, ndërsa është në rrugën e duhur për të siguruar “Këpucën e Artë” të tretë në po kaq sezone në Angli. “Erling është i pandalshëm”, tha Guardiola. “Nuk ka një qendërmbrojtës, madje as me armë, që mund ta ndalojë. Ne e dimë se sa vrasës është ai. Të gjithë e dinë. Ai po luan shumë më mirë në gjithçka këtë sezon. Janë detajet, ai qëndron 20 minuta apo gjysmë ore pas seancave stërvitore tani. Sezonin e kaluar, nuk e bëri as edhe një herë. Ai ishte atje sepse nuk ndihej mirë, ishte i lodhur, i mërzitur.

Jemi të lumtur për një tjetër tregolësh, për cilësinë e finalizimit, por ai u përfshi në këtë ndeshje. Ai nuk humbi asnjë top dhe luajti në mënyrë të pabesueshme jo vetëm me top, por edhe në mbrojtje dhe në sulm. Ai dha një pasim ekstra. Jam shumë i kënaqur për të. Nuk kam fjalë. Gjithçka që mund të bëjmë është ta bëjmë atë të luajë gjithnjë e më mirë dhe t’i japim sa më shumë topa në zonë. Kjo është ajo që ne duhet të bëjmë”.

Pep la të kuptohet gjithashtu se po shohim një version të përditësuar të sulmuesit të tij dhe pas pushimit në Europian, ai duket se ka zhvilluar aspekte të tjera të lojës së tij. “Ai shënoi tre gola, por nuk humbi një top”, shtoi Guardiola. “Kjo është një nga ndeshjet ku ai ka luajtur më së miri në të gjitha situatat. Kur i sheh ndeshjet dhe shikon se çfarë duam të bëjmë, ai e kupton sepse është një djalë i zgjuar”.

PANORAMASPORT.AL

NDIQE LIVE "PANORAMA TV"

---