Tirana është pothuajse gati për sfidën që do të luajë ndaj Vllaznisë, ditën e premte në orën 17:00. Me katër largime, Isuf, Jaku, Jonuzi e Vokrri, bardheblutë duhet të përfitojnë nga afrimet e Ernest dhe Smaçit.

Gjithsesi, dy lojtarët ende nuk janë federuar, pasi merkatoja vazhdon të jetë e bllokuar nga FSHF-ja, për shkak të Tolës, Bekajt dhe të tjerëve. Në këto kushte, Magani po mendon një strategji ndryshe. Të paktën në repartin e mesfushës ku mungesat dhe hemorragjia kanë qenë të mëdha. Gjithsesi, zgjidhja e Maganit është brenda skuadrës. Henry Marku me shumë mundësi do të luajë para mbrojtjes edhe pse Tola ka një shans për të qenë titullar. Për momentin, Haxhiu ka fituar duelin me Gjumsin, ndërsa në sulm do të jenë Ndreca, Prengaj dhe Abah. Në stol, Bajroviç, Zharmuni e me radhë.

MUNGESAT – Bardheblutë do të kenë mungesa të rëndësishme në këtë takim. Së pari është Zharmuni. Sulmuesi është operuar në sy dhe po stërvitet, madje me syze speciale për të mos dëmtuar shikimin dhe gjasat janë që ta nisë nga stoli. Po kështu, jashtë për këtë ndeshje janë Kola dhe Soler. Dyshja ka nga katër kartonë të verdhë dhe janë të pezulluar për shkodranët.

Gjashtë ndeshje ka Tirana që nuk fiton në kampionat. Bardheblutë fitoren e fundit e kanë shënuar në 10 nëntor ndaj Bylisit dhe më pas kanë katër barazime radhazi dhe dy humbet e fundit ndaj Dinamos dhe Laçit. Bardheblutë tashmë mbajnë vendin e tetë në renditjen e përgjithshme. Një pozicion ky që përkon me zonën “play out”. 18 pikë numëron skuadra e Gugash Maganit pas 19 javësh të luajtura.

PANORAMASPORT.AL

NDIQE LIVE "PANORAMA TV"

---