Karriera e Kevin De Bryjnes me Belgjikën është në fije të perit, pasi ylli i Mançester Sitit u shfaq duke i thënë drejtorit teknik Frenk Verkauteren, “unë po largohem”, përpara se të shpërthente pas ndeshjes.

I gjithë zhgënjimi i mesfushorit erdhi pas humbjes 2-0 me Francën, me golat e Randal Kolo Muanit dhe Osman Dembelesë që bënë diferencën në Lion. De Bryjne ka qenë një nga lojtarët kryesorë të Belgjikës gjatë të ashtuquajturës Gjenerata e Artë, e cila ngadalë ka humbur shkëlqimin e saj, me kombin që nuk arriti të shkojë në një finale të vetme të madhe në atë kohë.

Me 107 ndeshje gjatë një periudhe 14-vjeçare që përfaqëson vendin e tij, besnikëria e De Bryjnes deri më tani ka qenë e palëkundur. Në të vërtetë, ai ishte i vetmi anëtar i atij grupi lojtarësh, që dikur premtoi kaq shumë, i cili luajti në Francë të hënën. Por zemërimi i tij të hënën e ka vendosur në dyshim të ardhmen e tij në ekipin e Domeniko Tedeskos, pasi ai sulmoi bashkëlojtarët e tij dhe taktikat e skuadrës në një intervistë pas humbjes.

Menjëherë pas vërshëllimes së fundit, De Bryjne shkoi te Verkauteren dhe dukej se e bëri të qartë dëshirën e tij për t’u dorëzuar, përpara se të nisej për të biseduar me sulmuesin e Francës dhe Real Madridit, Kilië Mbape. Kapiteni i acaruar i Belgjikës u përball më pas me mediat ku u pyet nëse Franca ishte ekipi më i mirë.

“Po, ashtu është. Nuk ka shumë për të thënë për këtë. Ne ishim gjashtë lojtarë pas. Nuk kishte lidhje. As në pjesën e dytë. Ju jeni në disavantazh, apo jo? Pyes veten se çfarë shihni në ndeshje. Nuk është çështje tranzicionesh. Bëhet fjalë për mënyrën e lojës dhe njerëzit që nuk e bëjnë punën e tyre”.

PANORAMASPORT.AL

NDIQE LIVE "PANORAMA TV"

---