Partizani barazoi me rezultatin 1-1 përballë Skënderbeut. Takimi i vlefshëm për javën e 20-të të Superiores pa “demat” si kryesues aktual, të ndajnë pikët me korçarët e vendit të fundit.

Pas ndeshjes foli trajneri Aleksandër Veselinoviç. Trajneri i Partizanit shprehu dukshëm pakënaqësi për merkaton ku Partizani ka larguar lojtarë si Rrapaj, Cara, Hadroj dhe Mba.

“Kur bëhet fjalë për ndeshjen, mund t’i përgëzoj lojtarët për motivin dhe luftën në fushë, dhe mbështetjen e tifozëve. Kjo është e gjitha që mund të them për ndeshjen, por kam dhe diçka tjetër.

Kam 24 vite trajner. Kudo që kam punuar kam marrë përgjegjësinë e plotë dhe kam punuar me raporte të shkruara. Në raport është shkruar, më 5 janar, kam dërguar te i gjithë menaxhmenti i Partizanit. Jam munduar të shpjegoj ku kemi qenë, ku jemi dhe ku po shkojmë në raport me ambiciet që ka klubi. Kam shpjeguar gjithçka nëpërmjet argumenteve te ai raport i shkruar.

Kam shkruar te ai raport që momentalisht nuk jemi konkurrentë të denjë dhe nuk kemi cilësi të mjaftueshme për të garuar me konkurrentët më cilësorë që janë në kampionat. Nëse analizohet situata që para 3 javësh me Vllazninë, sot luajtëm pa 5 lojtarë(Hadroj, Rrapaj, Cara, Mba, Kote) që nuk janë të thjesht, por liderë të ekipit. Të mërkurën dy minuta para se të dal në stërvitje jam lajmëruar që nuk do kem dhe Mba. Mund të them me përgjegjësi se në këtë moment nuk kemi cilësi të mjaftueshme për ambiciet e klubit, nuk kemi ekuilibër. Mbase kemi alternativa, por nuk kanë qenë lojtarë stabël. Kemi pasur në protokoll vetëm 15 lojtarë dje në stërvitje dhe sot në ndeshje, hiq portierët. Nuk kemi as 20 lojtarë të mjaftueshëm për të realizuar idetë taktike në fushë, dhe si të 16-të kemi thirrur Jatën.

Mbase është shumë e rëndësishme të thuhen këto gjëra. Jam nga ato persona që dua të them të vërtetën dhe të qëndroj. Nuk e di sa seriozisht e kanë marrë raportin njerëzit që ja u kam dërguar atë. Unë bashkë me stafin nuk kemi ardhur kot këtu, por për ambicie të caktuara dhe kjo që po ndodh tani nuk plotëson as ambiciet e mia, po besoj as të klubit.

Fillimisht nuk mund të komentoj intervistën e drejtorit sportiv(Abilaliaj) pasi nuk e kam parë. Momentalisht mund të them se nuk kemi tre përforcime, por vetëm një, Padstrelau. Përsa i përket Sodiq nuk e di as ku ndodhet, në cilën pjesë të planetit jeton, nuk e kam fare idenë. Guxhufi ka ardhur po nuk është se jam konsultuar apo informuar nga dikush. Jam informuar vetëm për testet mjekësore dhe është përfshirë në proces të punës.

Është e vërtetë ajo që thashë në fillim për ndeshjen, mund të falenderoj çunat për angazhimin dhe tifozët për përkrahjen”, u shpreh Veselinoviç për “RTSH”.

PANORAMASPORT.AL

NDIQE LIVE "PANORAMA TV"

---