Iliria ka marrë një fitore mjaft të pastër,3-0, në startin e fazës së dytë. Fushëkrujasit janë afruar me kreun edhe pas hapit fals të Luzit në Librazhd, pasi tani ndodhen vetëm dy pikë larg luznjakëve. Stafa, Veriu dhe Henrike me golat e tyre i dhanë fitoren Ilirisë.

Ai barazim në Fushë Krujë gjatë sezonit të kaluar, që pukjanët i morën Ilirisë dhe i hoqën të drejtën për t’u ngjitur në Kategorinë e Parë, ishte ende i freskët në memorien e tifozërisë fushëkrujase. Sportdashësit gjatë gjithë takimit e kishin me trajnerin e pukjanëve, Sinan Bardhi, që nuk reshtën së ofenduari. Sa i përket takimit, ai nuk kishte histori. Kjo, sepse pukjanët ishin në ditën e tyre më të errët dhe me një portier pa përvojë dhe për Ilirinë u bë gjithçka e lehtë në fushën e stadiumit të Vorës. Në minutën e 15-të, Elion Stafa te harku i zonës, godet dhe shënon, 1-0. Në të 36-ën, Redi Veriu në pozicion diagonal me portën godet fuqishëm dhe vjen goli dytë.

Iliria shkon në pushim me rezultatin 2-0. Në fraksionin e dytë ka vend edhe për një gol të tretë, ku në të 52-ën braziliani Pedro Henrike godet brenda zonës. Topi i ikën nga duart portierit dhe regjistrohet goli tretë. Për Trajnerin Smajlin ishte gjithçka e zgjidhur dhe largon katër më të mirët. Koleci, Kallaku, Qehaja e Veriu i lënë vendin lojtarëve me më pak minutazh. Me këtë fitore, fushëkrujasit mbajnë vendin e tretë dhe tashmë janë shumë afër kreut, dy pikë larg Luzit dhe një pikë larg Sopotit, duke qenë në rrugën e realizimit të objektivit, ngjitjes në Kategorinë e Parë.

ILIRIA – TËRBUNI 3-0

GOLAT: Stafa 15’, Veriu 35’, Henrique 52’

ILIRIA: Xhika, Kallaku (Bakalli 77’), Vidal (Hoxha 85’), Stafa, B. Selmani, Veriu (B. Likaj 76’), Koleci (Lleshi 62’), Henrike, Qehaja (Ribaldo 61’), Markoçi, A. Selmani. Trajner: Dritan Smajli

TËRBUNI: Caku, Papaj, Troshani (Bizi 37’),(Filipi 53’), Longe (Arbana 27’), (Vecaj 53’), Gjini, Diaby, Këndezi, Vincent, Konate, Zëre, Laçeja. Trajner: Sinan Bardhi

Karton i verdhë: Laçeja 42’

Gjyqtarë: A. Koçi, F. Lama, R. Mersinasi (Durrës)

Vëzhgues: Arben Molla (Tiranë)

Delegat: Justin Bespalla (Shijak)

ABDULLA DUSHKU – PANORAMASPORT.AL

NDIQE LIVE "PANORAMA TV"

---