Inter, kundër Lacios duhet thyer një tabu! Zikaltërve nuk u falen hapat fals
Atalanta dhe Napoli vazhdojnë të vrapojnë dhe Interi duhet të bëjë të njëjtën gjë për të arkivuar sa më shpejt humbjen e parë në Champions League dhe për të mos iu larguar shumë kreut të klasifikimit, pa harruar faktin që do të rikuperojë një ndeshje kundër Fiorentinës.
Por zikaltrit do të luajnë në një transfertë, që të thuash është delikate duket pak, ndaj një skuadre që po kalon një moment të jashtëzakonshëm. Lacio e Baronit ka bërë shumë mirë në kampionat dhe në Europë. Për Interin është një impenjim shumë i vështirë nisur nga mungesat e Açerbit dhe Pavarit, por të paktën Simone Inzagi ka rigjetur Dumfrisin dhe shpreson te Lautaro Martinezi. Kapiteni argjentinas nuk ka gjetur dot golin në 5 ndeshje.
Për Interin është edhe një tabu që duhet të thyet, që lidhet me ecurinë e ndeshjeve të mëdha dhe rivalëve që luajnë për objektiva madhorë. Deri tani në këtë sezon nuk kanë ecur ashtu siç duhet, nëse i krahasojmë me sezonin e vitit të kaluar. Në fazën e parë, zikaltrit në vitin e kaluar kishin grumbulluar 19 pikë si fryt i 6 fitoreve dhe një barazimi kundër Juves. Mundën Fiorentinën 4-0, 5-1 Milanin, 1-0 Romën, 2-1 Atalantën, 3-0 Napolin dhe 2-0 Lacion.
PROBLEMATIKË- Këtë vit ecuria s’ka qenë aspak pozitive me rivalët direkt. Skuadra e Simone Inzagit ka arritur që të marrë vetëm 8 pikë në total deri tani ndaj skuadrave të forta: humbje me Milanin, fitore me Romën dhe Atalantën dhe një barazim i çmendur me Juventusin dhe Napolin. Sezonet janë të ndryshme, skuadrat janë të ndryshme dhe momentet gjithashtu.
Vitin e kaluar, ishin katër transferta në fazën e parë, ndërsa këtë herë 1 më pak. Dhe ja ku vjen një transfertë tjetër në “Olimpico” dhe rasti i artë që skuadra e Inzagit të bëjë një hap cilësor në këtë minikampionat kundër skuadrave të mëdha.
Interi ka bërë një nisje aspak të mirë të kampionatit në këtë sezon, pavarësisht se në javët e fundit ka fituar një lloj besimi dhe një stabilitet në mbrojtje që e ka lejuar të fitojë terren dhe të mos jetë e shkëputur nga skuadrat si Atalanta dhe Napoli që janë duke bërë realisht një kampionat të jashtëzakonshëm dhe duan të thonë fjalën e tyre.
GENTJAN ALINANI-PANORAMASPORT.AL
NDIQE LIVE "PANORAMA TV"
