Nuk ka rëndësi nëse ekipi pritës është Interi apo Milani. Në këtë fillim sezoni, “San Siro” ka qenë i tejmbushur dhe një prej stadiumeve me më shumë tifozë në Europë. Për të gjetur një biletë për ndeshjet e kampionatit është shumë e vështirë.

Në 5 ndeshjet e luajtura në Serinë A “San Siro” ka pasur 360 mijë tifozë. Një numër i frikshëm, që tregon se stadiumi ka qenë praktikisht i ezauruar. Tendenca vazhdoi edhe dje në sfidën Milan-Leçe. Në ndeshjen Inter-Milan për derbin e së dielës së kaluar, zikaltrit për pak nuk regjistruan “sold outin” e parë sezonal, për shkak të disa biletave që mbetën të pashitura.

Në atë ndeshje kishte 75.366 tifozë. Zikaltrit kanë një mesatare 72.677 tifozë për ndeshje ne 3 që kanë luajtur në shtëpi, ndërsa kuqezinjtë më pak 71.008 tifozë. Dy ekipet e Milanos renditen në “Top 5” të Europës për prezencën më të lartë të tifozëve në ndeshjet e para të luajtura në shtëpi. Gjermanët e Dortmundit janë të parët, ndërsa ndiqen nga Bajerni i Mynihut dhe Mançester Junajtid.

Pikërisht zikaltrit janë në vendin e katërt dhe Milani në të pestin. “Bernabeu” është në vendin e gjashtë dhe Roma në vendin e shtatë me 65.508 tifozë mesatarisht në 2 ndeshjet e luajtura në shtëpi. Klasifikimi përfundon me Marsejën, Uest Hemin dhe Totenhemin. Gjatë kësaj kohe ka pasur shumë diskutime në lidhje me shembjen e stadiumit dhe dy ekipet të ndërtojnë një impiant personal, por për momentin “San Siro” mbetet e vetmja alternativë ku të dyja ekipet mund t’i luajnë ndeshjet.

PANORAMASPORT.AL

NDIQE LIVE "PANORAMA TV"

---