Java e 20-të e Superiores/ Notat e skuadrave, shikoni formacionin më të mirë dhe më të dobët
Notat e skuadrave si dhe formacioni më i mirë dhe më i dobët i javës së 20-të të Kategorisë Superiore sipas “Panorama Sport”:
NOTAT E SKUADRAVE
VLLAZNIA 8.5 Të fitosh Klasiken e futbollit shqiptar është shumë e rëndësishme, por kur e bën me përmbysje, suksesi merr përmasa më të mëdha. Edhe pse pati probleme në pjesën e parë, kur mund të mësonte më shumë se një gol, reagimi i Vllaznisë ishte vërtet i fuqishëm në të dytën.
BYLIS 8 Pas Partizanit dhe Vllaznisë, Bylisi ka “vrarë” edhe Dinamon në Ballsh, duke marrë 3 pikë që e largojnë nga zona e ftohtë për momentin. Nuk ishte paraqitja më e mirë e mundshme, Bylisi pati edhe fat, por ka merita, sepse mundi kampionët e dimrit.
ELBASANI 8 Një fitore bindëse në një ndeshje, që u komplikua që në fillim. Më pas, duke përfituar edhe nga dobësia dhe përgjumja e kundërshtarit, Elbasani çoi gjithçka në rrjedhën që donte dhe shënoi 3 gola që e mbajnë me shpresë për të shkuar në “Final 4”.
EGNATIA 6 Ka kostumin e një skuadre eksperte, që nuk e humb durimin dhe arrin të fitojë edhe atëherë kur duket gati e pamundur. Egnatia vuajti ndoshta mungesat e rëndësishme që kishte me Laçin, nuk shkëlqeu, por në fund shkoi në shtëpi me 3 pikët.
SKËNDERBEU 6 Pika në fushën e Partizanit duket njësoj si fitore për Skënderbeun. Korçarët nuk u dorëzuan dhe në fund u shpërblyen me një pikë, që mund të shërbejë si një moment për kthesën e madhe të sezonit. Pjesa e dytë e tyre ishte vërtet e mirë.
PARTIZANI 5.5 Të kuqtë morën minimumin në një ndeshje, ku i kishin mundësitë për më shumë. Gabuan dhe pësuan gol në një moment, ku nuk mund të ndryshonin asgjë më pas. Ngushëllimi i vetëm në këtë rast është se edhe me barazim Partizani ka marrë vendin e parë në tabelë.
LAÇI 5.5 Humbja ndoshta në këtë rast nuk tregon saktë atë çfarë skuadra kurbinase dha në fushën e Egnatias. Mund të shënonte në ndonjë nga rastet që krijoi, por i pafalshëm duket gabimi në rastin e golit të pësuar, kur Laçi mbrohet me shumë pak lojtarë dhe ndëshkohet.
DINAMO 5 Të kontrollosh lojën dhe të krijosh raste nuk mjafton. Dinamo shpërdoroi raste flagrante në Ballsh dhe jo vetëm që nuk mundi të shënonte golin e fitores, por nuk tregoi kujdes maksimal në fund, kur pësoi golin e dytë dhe doli pa pikë ndaj Bylisit.
TIRANA 4.5 Pati fatin të shënonte e para në Shkodër, duke e çuar lojën aty ku donte. Krijoi edhe disa mundësi të tjera që u humbi me shumë lehtësi. Në pjesën e dytë me po aq lehtësi pësoi dy gola, duke u shfaqur si një skuadër shumë “e lehtë” në prapavijë.
TEUTA 4 Paraqitje shumë e dobët e Teutës, që nuk di të menaxhojë avantazhin e fillimit. Gabime të pafalshme në mbrojtje gjatë 45 minutave të dyta, madje edhe në luftën në ajër, që ky ekip e ka pikën më të fortë. Pëson 3 gola me shumë lehtësi.
PANORAMASPORT.AL
