Bylisi ka mbyllur të gjitha detajet për sfidën që luajnë sot në orën 14:00, në “Adush Muçaj” kundër Laçit, ku do të synojnë rikthimin te fitorja.

Kapiteni Marin Abazaj duket optimist, madje sipas tij, skuadra meritonte më shumë ndaj Dinamos. Për “Panorama Sport”, Abazaj ka pohuar:

“Vijmë pas dy sfidave pozitive dhe një rikthimi te rezultatet e mira, por më shumë te loja në rritje si skuadër. Kemi bërë mirë dhe kemi shfaqur cilësi e dominim ndaj Teutës në shtëpinë tonë, por edhe ndaj Dinamos në transfertë. Madje me këtë të fundit e kemi merituar fitoren, sepse shënuam dy herë dhe një gol më se të rregullt që nuk duhej anuluar. Goditëm edhe traversën me Malomon.

Mëkat që nuk dolëm më tri pikët dhe është jo normale që anulohen gola të rregullt për ne dhe si për çudi i njëjti anësor që na ka dëmtuar edhe në Rrogozhinë. Shpresoj dhe kam besim se do të vijojmë të kemi rritje, sepse është punuar shumë për të qenë në vendet e sipërme.

Ndaj Laçit në shtëpinë tonë duhet të rikthehemi të fitorja dhe ta mundim kundërshtarin për shumë motive, më kryesorja që të ngitemi në renditje. Kemi mundësinë më të mirë që ta bëjmë një gjë të tillë”, tha fillimisht kapiteni i mallakastriotëve. Abazaj është një nga lojtarët me më shumë vite te Bylisi, bashkë me Ruçin apo Kasajn.

Në prag të kësaj ndeshje delikate në “Adush Muçaj”, ai u bën thirrje tifozëve që të jenë të shumtë sot në orën 14:00. “Luajmë një duel të radhës në një moment mjaft të mirë dhe kemi nevojë për mbështetjen e tifozëve tanë. Unë i falënderoj që na kanë qëndruar gjithnjë në krah. Por u bëj sërish kërkesë që të jenë sa më të shumtë, sepse ne do të bëjmë maksimumin dhe do ta fitojmë këtë duel shtëpie. Fitorja me Laçin konfirmon forcën e grupit të Bylisit, por na shërben më shumë edhe për vijimin e garës. Ndaj të jemi të bashkuar dhe të shkojmë drejt suksesit”, tha 22- vjeçari.

E. SALIU-PANORAMASPORT.AL

NDIQE LIVE "PANORAMA TV"

---