Tomori e ka mbyllur me sukses minifazën përgatitore dimërore dhe nga e hëna beratasit kanë nisur punën për ndeshjen hapëse të fazës dytë të kampionatit. Këtë fundjavë, beratasit do të luajnë në shtëpi ndaj Luftëtarit pretendent, që aktualisht kryeson Grupin B, ku bën pjesë dhe Tomori.

Gjatë seancës së parë stërvitore të kësaj jave, skuadra ka zhvilluar një analizë, nga ku trajneri Iken Droboniku i ka kërkuar futbollistëve të tij një vlerësim dhe impenjim sa më maksimal gjatë  gjithë procesit stërvitor të kësaj jave. Theksi është vendosur edhe te  rëndësia që ka ndeshja e radhës, ku kërkohet suksesi përballë Luftëtarit. Ai ka konfirmuar zyrtarisht për “Panorama Sport”, se qendërmbrojtësi kolumbian Edilson Perez, si dhe sulmuesi afrikan Mamadi janë zyrtarisht pjesë e Tomorit si përforcime nga merkato e dimrit.

Procesi do të jetë i hapur për ndonjë afrim të mundshëm cilësor deri në limitet e afatit zyrtar. Kapiteni i beratasve Sali Kumani, duke folur për gazetën për ndeshjen e radhës ka deklaruar se beratasit janë optimistë para gjirokastritëve. “Kemi punuar shumë gjatë minifazës dhe gjendja në skuadër përpara ndeshjes me Luftëtarin është mjaft optimiste. Luajmë në fushën tonë dhe do ta shfrytëzojmë në maksimum këtë avantazh që kemi. Me mbështetjen e tifozërisë beratase. gjithçka është e mundur për ta kaluar me sukses ndeshjen hapëse të fazës dytë me Luftëtarin”, u shpreh kapiteni i Tomorit, Sali Kumani. EDI SPAHIU

 

Luftëtari forcohet me një lojtar ganez

Drejtuesit e Luftëtarit nuk janë kursyer as në merkaton e dimrit, në mënyrë që objektivi madhor, ngjitje në Kategorinë e Parë, të mos diskutohet. Përforcimi i fundit në merkato vjen për mesfushën, ku bëhet fjalë për një lojtar ganez, i cili më herët ka luajtur edhe në Spanjë, SHBA, Meksikë, Qipro, Suedi dhe Angli. Pikërisht. bëhet fjalë për 28-vjeçarin Mikeal Avah Domebemvinduah. Nuk dihet nëse trajneri Shabani do ta llogarisë ganezin për ndeshjen e së dielës ndaj Tomorit. Më herët Luftëtari ka afruar Kananaj, Çarçani, Agu, Majkëll, si dhe ka rikthyer Avdulaj dhe portierin Basha. Gëzim Beqiri

PANORAMASPORT.AL

NDIQE LIVE "PANORAMA TV"

---