Vora është brenda objektivave të saj, pavarësisht pengesave që po has në rrugëtimin e saj në të dy kompeticionet. Pas kualifikimit të vështirë ndaj Orikut, vëmendja është te ndeshja e së hënës kundër Kukësit në “Kukës Arena”.

Për kapitenin e Vorës, Xhuljo Tabaku, kjo sfidë është shumë e rëndësishme, pasi vendos shumë për fatin e kreut. “Skuadra duhet të vendosë diferenca që të jetë e sigurt. Ende kemi mungesë freskie, por malorja e Vorës nis nga Kukësi. Fitorja në këtë takim na duhet patjetër dhe po përgatitemi për të. Vora ka ekip cilësor, madje më të mirë se sa Besa apo Flamurtari dhe e meriton të jetë në Superiore. Në këtë klub investohet shumë, por edhe kërkohet shumë. Kështu që e kemi vetë në dorë shansin për të bërë historinë e këtij klubi. Humbja në Fier ishte fatale, ekipi ishte jo i qetë edhe pse u ndëshkuam nga dy goditje. Në Kukës nuk duhet humbur, madje dhe barazimi është i papranueshëm, sepse Vora është një ekip i projektuar vetëm për fitore.

Mundësia jonë për t’u ngjitur në Superiore është reale. Beteja është e fortë këtë sezon, pasi edhe Flamurtari me Besën i kemi pranë në tabelë, prandaj duhet që të distancohemi nga vendi i parë. Detyrimisht, kjo na bën që të shkojmë për tri pikët në Kukës. Faza e dytë do të jetë shumë e vështirë për të gjitha ekipet, ku as Vora nuk bën përjashtim. Edhe Kukësi kërkon pikët e veta, ndaj do të jetë një përballje mjaft e fortë dhe që do kujdes. Ne kemi pasur problem ruajtjen e qetësisë para ndeshjes, por edhe të freskisë gjatë saj. Këto duhen larguar menjëherë në këtë takim të vështirë”, deklaroi  mesfushori Tabaku për “Panorama Sport”.

ABDULLA DUSHKU-PANORAMASPORT.AL

NDIQE LIVE "PANORAMA TV"

---