Vora e ka nisur në mënyrën e duhur sezonin e ri. Përveç fitores, vorakët kanë rikthyer në stadium edhe tifozerinë. Që në fillim të fazës përgatitore, Vora i ka bërë të qarta objektivat dhe synimet e saj. Ngjitja në Superiore, tashmë mbetet thjeshtë një detyrim për lojtarët dhe stafin.

Një nga prurjet e Vorës këtë sezon ishte edhe 22-vjeçari, Irgi Kasalla, që erdhi nga Korabi dhe debutuar me gol që në ndeshjen e parë, duke i dhënë tri pikë skuadrës. Për “Panorama Sport” tregon kalimin te Vora dhe synimet që ka me klubin e ri.

Gjatë merkatos së verës iu bashkuat Vorës. Çfarë ndikoi në kalimin tuaj nga Korabi te klubi vorak?

Projekti dhe objektivi i klubit ishin arsyet kryesore. Kështu që pranova të firmosja dhe të bëhesha pjesë e klubit të Vorës.

Kjo përbërje dhe grup lojtarësh a ju bind për të bërë të mundur realizimin e objektivit, ngjitjen në Superiore?

Vora është projektuar për elitë. Me këtë grup besoj se do t’ia dalë. Këtu gjeta lojtarë të përvojës, prej të cilëve mund të mësosh shumë.

Një gol me vlerën e tri pikëve. Çfarë synon Kasalla te Vora?

Unë te Vora synoj të realizoj objektivin e ekipit dhe të shkojmë sa më lart në renditje dhe në nivel.

Sipas jush, kush janë rivalët kryesor të Vorës në kampionat?

Në këtë kategori, çdo ekip të prish punë. Duke parë merkaton dhe përbërjet e reja të skuadrave, mendoj se dy prej tyre dua t’i veçoj. Flamurtari dhe Besa kanë bërë mirë dhe mund të jenë dy rivalet tona.

Këtë javë ndesheni me Kukësin, a premton sërish gol?

Unë futem në fushë gjithmonë për të dhënë maksimumin tim dhe sigurisht të ndihmoj skuadrën me gola dhe asist. Patjetër që edhe me Kukësin dua të shënoj, por më shumë rëndësi kanë tri pikët për ekipin.

ABDULLA DUSHKU- PANORAMASPORT.AL

NDIQE LIVE "PANORAMA TV"

---