Miqësorja Kastrioti–Korabi është zhvilluar në fushën stërvitore të Fushë-Krujës, që u drejtua me kompetencë nga gjyqtarja, Kejsi Tafili, e kolegjiumit të Tiranës. Për të dy skuadra kjo ka qenë ndeshja e fundit miqësore, ose prova gjenerale para fillimit të sezonit të ri.

Të dy trajnerët, Bubeqi i Kastriotit dhe Canaj i Korabit, edhe pse kishin disa mungesa për shkak dëmtimesh, kanë aktivizuar fillimisht lojtarët bazë që mendojnë të hedhin në fushë në ndeshjen e parë zyrtare. Më pas kanë provuar dhe lojtarët e stolit. Trajneri i Korabit ka shprehur rezerva për kushtet jo të mira të terrenit ku u zhvillua takimi. Loja në pjesën e parë ka qenë e ekuilibruar, ku repartet difensive kanë qenë në lartësinë e duhur, ndonëse rastet për shënim kanë qenë me pikatore. Kastrioti në këtë fraksion ka bërë dy ndërrime të detyruara, pasi Berisha në të 22- ën dhe Toni në të 30-ën u dëmtuan dhe u zëvendësuar nga Moses dhe Ndreu.

Pjesa e dytë ka qenë kopje e së parë. Kastrioti e ka nisur me të njëjtin formacion, ndërsa trajneri i Korabit bëri 3 zëvendësime. Në vazhdimësi të lojës, të dy trajnerët aktivizuan të gjithë lojtarët e gatshëm. Krutanët e gjetën golin e avantazhit në të 67-ën pas një goditje dënimi. Nigeriani Moses ka gjuajtur në drejtim të portës nga 25 metra. Topi fillimisht grushtohet nga portieri All, por Ajazi shumë pranë e dërgon “sferën” e kthyer në rrjetë, 1-0 për Kastriotin. Më pas loja bëhet më interesante, por gjithçka mbyllet me golin e Ajazit.

KASTRIOTI- KORABI 1-0

GOLI: Ajazi 67’

KASTRIOTI: Puja, Qyra, Krasniqi, Doseh, Musaj, Toni (Ndreu 30’), Mauricio, Arapi, Berisha (Moses 20’), Kuka, Ajazi; (U aktivizuan: Manxhellaku, Allamani, Biba, Xhixha, Hodo, Kullaj, Xhafa, Peku, Veseli, Murati). Trajner: Dorjan Bubeqi

KORABI: Qyrani, Kurti, Sina, Andoni, S.Lila, Buci, Mziu, Kryemadhi, Shehu, Reçi, Çema; (U aktuvizuan: Alla, Tosha, Hasaj, Tota, Ndreaj, Stana, Halilaj, Çikani, Peralta). Trajner: Agim Canaj GJYQTARË: K. Tafili, G. Menaj, O.Basha (Tiranë)

SHKËLQIM HASANI-PANORAMASPORT.AL

NDIQE LIVE "PANORAMA TV"

---