Katër portierë cilësorë të federuar, 3 janë aktivizuar titullarë në 6 javë/ Klubi i Kategorisë së Parë për rekord
Pogradeci nuk ka të ndalur me afrimet në merkato, teksa ditën e fundit janë federuar edhe 2 futbollistë të tjerë, të cilët ishin të lirë duke iu bashkuar liqenorëve. Bëhet fjalë për sulmuesin Erjon Dragoj dhe portierin malazez Milan Jelovaç.
Interesant është fakti, se liqenorët janë të federuar plot 4 portierë, 3 prej të cilëve janë aktivizuar titullarë, në këto 6 javë të para, teksa i katërti pritet të debutojë nesër.
Mateo Baci u aktivizua titullar në dy duelet e para ndaj Kastriotit dhe Besës, teksa një gafë ndaj kavajasve i kushtoi shtrenjtë gardianit pogradecar, i cili është pezulluar pa afat nga klubi dhe po stërvitet me ekipin e të rinjve.
Titullarë në këto 6 javë të para janë aktivizuar edhe dy portierët e tjerë, maqedonasi Nikoloski dhe korçari Beqiri.
Por duket se drejtuesit nuk janë plotësisht të bindur, duke afrua së fundmi malazezin Milan Jelovaç. 31-vjeçari së fundmi ka qenë me skuadrën e Zvijezda 09 në Bosnjë Hercegovinë.
Një portier me mjaft eksperiencë që në sezonin 2014/2015 është shpallur kampion në elitën e futbollit malazez me Rudar Pljevlja. Gjasat janë të mëdha që Jelovaç të debutojë si titullar në duelin e ditës së shtynë ndaj Kukësit, duke u bërë portieri i katërt që aktivizohet te Pogradeci në 7 javë.
PANORAMASPORT.AL
NDIQE LIVE "PANORAMA TV"