Një portugez, një holandez, një turk dhe një serb. Duket si fillimi i një barsolete, por në të vërtetë është formula e re që Tiago Mota ka për suksesin me Juventusin.Në Lilë ka lindur “Zonja” e katër yjeve. Fransisko Konseisao, Teun Kopmeiners, Kenan Jildiz dhe Dushan Vlahoviç. Nuk kishte lindur deri më tani për shkak të dëmtimeve dhe afrimeve të merkatos në ditët e fundit, por tashmë Tiago Mota prej 6 nëntorit mund të mbështetet te 4 lojtarët që ishin projektuar titullarë që në startin e këtij sezoni.

PRESTIGJATORI- “Konseisao është lojtari më pak i parashikueshëm nga katër yjet me të cilët Tiago Mota kërkon të pushtojë kompeticionet me Juventusin e tij. Me driblimet e tij, shpejtësinë dhe inteligjencën, talenti portugez bëhet i palexueshëm dhe këtë aftësi të 21-vjeçarit Mota do ta shfrytëzojë për të befasuar kundërshtarët.

KRIJUESI- Kenan Jildiz është lojtari me fantazinë më të madhe që Tiago Mota ka në repartin ofensiv. Talenti turk është ai që di të prodhojë më shumë pasime të cilat kundërshtarët nuk i lexojnë dot lehtësisht. Por kjo është vetëm një nga cilësitë e tij. Me prerjet që ai bën drejt qendrës dhe goditjet “alla” Del Piero, Kenan Jildiz është arma me të cilën Mota mund të zgjidhë edhe ndeshjet ku nuk po arrin dot të shohë Juventusin e tij më të mirë.

EKUILIBRUESI- Teun Kopmainers në disa raste shihet shumë pak, por ndihet gjithmonë shumë prezenca e tij. Kopmainers arrin të diktojë ritmin e lojës në fazën sulmuesi, di të ndërhyjë me pasimet e tij në momentin e duhur dhe mbi të gjitha është një kualitet i shtuar për katërshen sulmuese të Juves.

FINALIZUESI- Dushan Vlahoviç është i vetmi nga katër lojtarët e repartit ofensiv që është gjithmonë titullarë. Me numrin 9 mbi shpinë, sigurisht që ka për detyrë edhe të çojë topin në rrjetë më shumë se kushdo tjetër. Deri më tani e ka realizuar me sukses këtë gjë edhe pse ka ende vend për përmirësim.

PANORAMASPORT.AL

NDIQE LIVE "PANORAMA TV"

---