Korabi i drejtuar nga trajneri Agim Canaj ka arritur të gjejë forca dhe brenda 4 ditësh bërë autokritikën e humbjes në shtëpi me Apoloninë. Dje dibranët luajtën sërish në shtëpi, ku përballë kishin Pogradecin, por kësaj here takimi u luajt pa praninë e tifozëve, për shkak të dënimit të dhënë nga Disiplina.

Më në fund Korabi arriti të thyej “tersin” e fushës, pasi dje mori fitoren e parë sezonale në stadiumin e Peshkopisë, ku mposhtën Pogradecin në shifrat 3-1. Pjesa e parë ka qenë e ekuilibruar, ku të parët shënuan vendësit me Kryemadhin dhe barazoi Alidema. Në të dytën Korabi dominoi dhe shënoi dy gola që e ngjisin skuadrën e trajnerit Canaj në vendin e nëntë me 11 pikë.

Ndeshja- Korabi dhe Pogradeci e nisën përballjen pa frikë dhe duke qenë në kërkim të fitores për minuta të tëra u zhvillua një lojë e fortë. Gjithsesi, duhet të vinte minuta e 28-të që të zhbllokohej rezultati. Një aksion i bukur për dibranët që nis nga mbrojtja me protagonist Kurtin, i cili pasi avancon përpara shërben për Peraltën në të majtë. Paraguaiani shërben në zonën pogradecare dhe Kryemadhi me qetësi e dërgon topin në rrjetë dhe 1-0 për Korabin. Përpos avantazhit të vendasve, loja ka qenë e ekuilibruar. Liqenorët nuk stepen pas pësimit të golit dhe në minutën e 41-të arritën që të barazonin rezultatin në shifrat 1-1.

Me këtë rezultat u mbyll pjesa e parë. Korabi është më i qartë në fraksionin e dytë, ku shënoi edhe dy gola të tjerë. Minuta 61, aksion i rrjedhshëm i dibranëve me disa pasime me protagonist Peraltën dhe në fund Reçi dyfishon për dibranët, 2-1. Dhjetë minuta më vonë vjen edhe goli i tretë për Korabin. Stana kroson nga këndi dhe Sina brenda zonës mike, ngrihet në ajër mbi të gjithë dhe me kokë e dërgon topin në rrjetë dhe rezultati shkon në 3-1. Trajneri Nikaj bën disa freskime, por pa rezultat dhe gjithçka mbyllet në shifrat 3-1.

Korabi-Pogradeci 3-1

Golat: Kryemadhi 28’, Reçi 61’, Sina 71’ / Alidema 41’

 KORABI: Qyrani, Kurti, Sina, Paplekaj, Hasaj (Lushaku 88), Andoni (Stana 35’), Buci, Kryemadhi, Reçi (Ndrejaj 83’), Peralta (Shehu 88’), Marku; (Në dispozicion: Alla, Çomo, Halilaj, Çema, Tasho, Cikani). Trajner: Agim Canaj

 POGRADECI: Jelovac, Kastrati, Lila, Ivani, Pengu, Hysenllari (Topllari 65’), Kazim (Këndezi 76’), Danladi (F.Pius 76’), Nallbati (C.Pius 65’),  Alidema, Panadiç; (Në dispozicion: Beqiri, Nikoloski, Pere, Kapllani, Duarte). Trajner: Samuel Nikaj

Kartonë të verdhë: Hasaj 39’, Peralta 55’, Marku 90’ / C.Piues 84’, F.Pius 90’

Gjyqtarë: A.Koçi, F.Lama, H.Lisaku (Durrës)

Delegat: Pajtim Lapi (Shkodër)

Vëzhgues: Arben Molla (Laç)

NDERIM GOCI- PANORAMASPORT.AL

NDIQE LIVE "PANORAMA TV"

---