Kapiteni i Teutës, Blerim Kotobelli, mendon se ka ardhur momenti që Teuta të rikthehet te rezultatet pozitive në këtë kampionat dhe t’i ngjitet sa më shpejt pjesës së sipërme të tabelës.

Mbrojtësi polivalent i durrsakëve, në një intervistë para duelit ndaj Elbasanit, thekson se grupi i lojtarëve do të japë shpirtin në fushë për ta fituar këtë ndeshje. Kotobelli shprehet e njeh mjaft mirë kundërshtarin.

Pas atij barazimi kundër Bylisit, si është atmosfera në ekip?

Normalisht që për atë barazim ndaj Bylis, si fillim na vjen shumë keq, pasi kemi zhvilluar një ndeshje të mirë, ku për fat të keq nuk arritëm të fitojmë. Gjithsesi, e kemi përgatitur ndeshjen ndaj Elbasanit me qetësi.

Çfarë prisni nga ndeshja me verdheblutë?

Dueli me Elbasanin dihet që është shumë i fortë. Presim të japim shpirtin në fushë të gjithë lojtarët, siç e kemi dhënë deri në këto momente. Shpresojmë të vazhdojmë me ritmin e duhur dhe shpresoj të marrim tri pikët dhe të rikthehemi te suksesi.

Mendoni se presioni do të jetë më i madh te kundërshtarët?

Nuk besoj që Elbasani është nën presion. Unë shoh ekipin tim, ku jam tani dhe shpresoj që nesër të jemi të gjithë të bashkuar dhe të dalim nga ajo ndeshje me një rezultat pozitiv.

Me ekipin që keni, deri ku mund të shkojë kjo Teutë?

Teuta i ka të gjithë mundësitë të jetë në pjesën e sipërme të klasifikimit, por si unë, dhe të gjithë shokët e skuadrës shohim ndeshjen e radhës në këto momente që jemi.

Jeni një lojtar që bëni disa role. Ku ndiheni më mirë te Teuta, në çfarë pozicioni?

Unë jam me idenë të fitojë ekipi, më pas pozicioni im në fushë nuk është se përben problem, unë luaj aty ku Teuta ka nevojë.

ZAMIR QYPI-PANORAMASPORT.AL

NDIQE LIVE "PANORAMA TV"

---