Kukësi ka shpërthyer me gjashtë gola në Kupë duke fituar ndaj Albanëve të Kategorisë së Dytë. Një formalitet për të besuarit e Emiljano Çelës, të cilët dominuan nga minuta e parë dhe e fundit, duke shënuar nga tre gola për secilën pjesë.

Viktor dhe Metani gjetën nga dy herë rrugën e rrjetës, ndërsa emrin në listën e golashënuesve e shënuan edhe Mejdani me Hilajn. Një test i rëndësishëm që vlen për zhbllokimin e skuadrës para sfidës në kampionat përballë Kastriotit.

NDESHJA – Çela bëri një rrotacion të butë në skuadër, duke lënë pushim një pjesë të titullarëve. Ambiciet e Kukësit për të shënuar duken që në fillim të sfidës, pasi ushtrojnë presion në zonën kundërshtare dhe qarkulluar topin. Zhbllokimi i rezultatit erdhi në mesin e pjesës së parë, ku në minutën e 28-të Viktor hapsi serinë e goleadës. 4 minuta më pas, Mejdani dyfishon shifrat. Miqtë hasin vështirësi për të reaguar, ndërsa Kukësi nuk pajtohet me kaq. Përpjekjet e vendasve u konkretizuan në të 40-ën, ku sërish Viktor tregohet i saktë dhe i jep mundësinë skuadrës së tij të shkojë në dhomat e zhveshjes me rezultatin 3-0.

E dyta nis me shumë zëvendësime, por vendësit janë sërish në kontroll të lojës. Verilindorët godasin sërish dy herë shumë shpejt në minutat 63 dhe 65 me autor të golit Metanin, duke i dërguar shifrat në 5-0. Praktikisht luhet sa për formalitet, por gjithsesi të besuarit e Çelës nuk e kanë thënë ende fjalën e fundit. I sapofutur në lojë, Hilaj shënon golin e gjashtë dhe të fundit, duke i dhënë mundësinë Kukësit të siglojë një fitore tenistike. Në turin e dytë Kukësi do të masë forcat me Pogradecin.

 

KUKËSI – ALBANËT 6 – 0

GOLAT: Viktor 28′, 40′, Mejdani 32, Metani 63′, 65′, Hilaj 72′

KUKËSI: Nova, Momoh, Mejdani (Peposhi 46′), Viktor (Ouen 53′), Metani, Sadiq, Kapllanaj, Lala (Lamellari 46′), Selita (Hilaj 64′), Birçaj (Bica 46′), Danaj. (Në dispozicion: Dervishaj, Jusuf, Beshiraj). Trajner: Emiljano Çela

ALBANËT: Lenja, Trokshi, Çuni, Shembitraku, Petritaj, Spahiu (Xhabafti 46′), Alushi, Zouzou (Ferizolli 46′), Shkreta (Gaxhaj 59′), Methoxha (Skura 46′), Ahmati (Anderson 46′). (Në dispozicion: Kaziu, Mania, Maçi, Mema, Hysenbelliu. Trajner: Altin Birçe

GJYQTARË: E. Menkshi, G. Mënaj, E. Cena (Korçë)

VËZHGUES: Briken Pjetrushi (Lezhë)

DELEGAT: Agron Kastrati (Tiranë)

VLADIMIR MEMA-PANORAMASPORT

NDIQE LIVE "PANORAMA TV"

---