Nuk ka më dilema, skuadra e Kukësit do të luajë në “Kukës Arena”. Edhe pse ditë më parë u dhanë sinjale, se mes drejtuesve të rinj dhe bashkisë së këtij qyteti kishte përplasje, për shkak se u mbyllën dyert e stadiumit për të zhvilluar konferencën për shtyp ku do të prezantoheshin drejtuesit e rinj, palët kanë gjetur marrëveshjen.

Madje, për të pasur një mbështetje sa më të madhe të tifozëve ditën e shtunë përballë Erzenit, sfidë e cila do të luhet në orën 17:00, drejtuesit kanë vendosur që hyrja të jetë e lirë. Të shtunën nis zyrtarisht një epokë e re për këtë klub, i cili në të kaluarën fitoi gjithçka në futbollin shqiptar, ndërsa këtë sezon do i duhet të militojë në Kategorinë e Parë.

Blutë kanë qenë skuadra që i ka nisur më vonë nga të gjitha rivalët e tjera përgatitjet, por shpresohet që të jetë plotësisht gati për sfidën e parë ndaj shijakasve, të cilët gjithashtu vijnë nga Superiorja. Kukësi i këtij sezonin mbetet i gjithi për t’u parë nën drejtimin e Ilir Spahiut, që ka marrë përsipër të kompozojë një skuadër në limite dhe me mundësitë që i ka lejuar ky sesion merkatoje.

VLADIMIR MEMA-PANORAMASPORT.AL

NDIQE LIVE "PANORAMA TV"

---