Për të disatën herë ai është më i miri në fushën e lojës. Edhe të mërkurën në Champions në fushën e Spartës së Pragës, në një ndeshje që mund të shndërrohej e komplikuar, zikaltrit e kanë menaxhuar shumë mirë duke marrë 3 pikë vendimtare.

Stefan De Vraj i merr rrallë çmimet apo vitrinën, por vështirë që të gjesh një ndeshje të gabuar prej tij. Dhe konfirmimi i radhës erdhi në “Letna”. “Titullar i padiskutueshëm. Një siguri konstante. Lider i vërtetë i repartit dhe i skuadrës. Nota 6,5”, shkruhet në “Gazzetta Dello Sport”. Açerbi është thjesht një kujtim. De Vraj ka përfituar edhe nga dëmtimet e shpeshta muskulore të shokut të repartit për t’i rrëmbyer vendin dhe ndoshta të ardhmen. Për të thënë të vërtetën, minutat e tij me Interin, De Vraj i ka fituar me dhunë.

Edhe kur ishte mbrapa në hierarki, edhe kur ishte i dëmtuar gjithmonë gjente forcë. Stefan ishte dhe është një kolonë e skuadrës së Simone Inzagit. Në total në këtë sezon ka grumbulluar 1757 minuta në 24 ndeshje në të gjitha kompeticionet. I vetmi kompeticion ku nuk ka luajtur është Kupa e Italisë, ku Simone bëri rrotacion masiv. Në përgjithësi, De Vraj është gjithmonë. Jemi vetëm në fillimin e vitit të ri dhe tashmë e ka parakaluar dyfish Açerbin 24 me 11. Numra që konfirmojnë faktin që ai është gjithmonë vendimtar dhe në anën tjetër që italiani ka probleme prej kohësh. Dëmtimet e shpeshta kanë bërë që drejtuesit e Interit në fillimin e sezonit të merrnin vendimin për të ndërprerë kontratën me Açerbin, por edhe me vetë De Vrajin.

Por situata do të ndryshojë sepse holandezi me shumë mundësi do të sigurojë të drejtën për të qëndruar edhe një tjetër sezon me ngjyrat e Interit. Ai që do të largohet është Açerbi, i cili vazhdon të punojë në mënyrë individuale dhe nuk ka përmirësime. Sigurisht që Interi do të kërkojë të afrojë ndonjë qendërmbrojtës në merkaton e verës, por De Vraj do të jetë aty për të dhënë kontributin e tij kur Interi të ketë nevojë dhe të jetë gjithmonë lider i heshtur.

Këtë ka bërë gjatë karrierës dhe ka merituar respektin e shokëve të skuadrave ku ka luajtur. Tashmë ai është një veteran i skuadrës së Interit dhe gjithmonë i përfshirë në kauzë. Për më tepër kurrë nuk ka bërë polemika, por ka qenë i qetë për të pranuar vendimet e trajnerit.

PANORAMASPORT.AL

NDIQE LIVE "PANORAMA TV"

---