Pa nënvlerësuar aspak ndeshjet e Kupës, që për nga rëndësia vijnë pas atyre të kampionatit, është bërë zakon për skuadrat e Kategorisë së Parë, që vëmendjen ta përqendrojnë në kampionat.

Pas ndeshjes së Kupës, që do të zhvillohet nesër, ora 13:30, në stadiumin “Gjorgji Kyçyku” ndaj Luftëtarit, skuadrën e Nikajt e pret transferta e Vlorës në kampionat. Mbrojtësi Erjon Dragoj është një nga përforcimet e fundit të Pogradecit dhe për “Panorama Sport” u shpreh: “Testi me Skënderbeun na vlejti jo vetëm për të na mbajtur në tonus, por edhe për të ruajtur ritmin e kampionatit. Pavarësisht se fitorja u arrit në miqësore, ajo do të na shërbejë moralisht për të përballuar me sukses Flamurtarin në Vlorë.

Skuadra po tregon rritje në lojën e saj dhe besoj se ka ndikuar forma dhe klima e mirë që e karakterizon grupin. Ekipi ka mundësi për më shumë, sepse elementi cilësor është mjaft i mirë dhe premtues për të ardhmen. Çdo ndeshje duhet vlerësuar. Fitorja mbetet objektivi i vetëm ndaj Luftëtarit në Kupë. Më pas, do të udhëtojmë drejt Vlorës. Një transfertë e vështirë, por jo e pa mundur. Ecuria e skuadrës në ndeshjet e fundit, si dhe besimi i grupit na bën optimistë për ta kaluar me sukses edhe Flamurtarin”.

NDERIM GOCI-PANORAMASPORT.AL

NDIQE LIVE "PANORAMA TV"

---