Dinamo është skuadra e cila mbyll vitin 2024 në vendin e parë të Kategorisë Superiore dhe këtë e ka arritur me një fitore të rëndësishme përballë Egnatias kampione në fuqi me shifrat 2-1.

Nuk ka qenë një fitore e thjeshtë për skuadrën e Ilir Dajës, e cila ka vuajtur lojën e rrogozhinasve, shumë kërkues pranë zonës së bluve. Por cilësia e individëve ka bërë diferencën dhe Dinamo ka treguar se ka në përbërje lojtarë që mund të ndryshojnë fatin e ndeshjeve.

Mandela ishte ai i cili ia dha avantazhin bluve në pjesën e parë duke mposhtur Dobjanin. Në të dytën, Zabërgja kaloi pa vështirësi dy emra me shumë peshë si Veseli e Xhemajli, duke dhënë asistin perfekt për Nanin i cili dyfishoi shifrat.

Egnatia tentoi gjithçka për të ndryshuar fatin e sfidës dhe loja e saj ofensive u përmirësua me hyrjen në fushë të Kasës, autor i asistit për golin e Ndrecës që rihapi ndeshjen. Por blutë u mbrojtën me rregull në minutat e fundit, duke siguruar një fitore 2-1 që i jep titullin simbolik të “kampionëve të dimrit”, por edhe i konfirmon si pretendentë të rëndësishëm për fitoren e titullit.

DINAMO-EGNATIA 2-1
25′ Mandela, 58′ Nani / 67′ Ndreca

NGJARJET KRYESORE

90’+4’ Mbyllet ndeshja me fitoren 2-1 të Dinamos.

90’+4’ Edhe Sali ndëshkohet me karton të verdhë për vonesa loje.

90’+4’ A;liev harkon në zonë për Bakajoko, i cili gjuan me kokë por nuk gjen portën.

90’+2’ Lorran ndëshkohet me të verdhë për vonesa loje.

90’+1’ Fangaj dhe Lushkja i lënë vendin ën fushë Ramës dhe Ahmetajt në radhët e Egnatias.

90’ Jepen 4 minuta shtesë.

88’ Maliqi merr vendin e Qefaliajt në radhët e Dinamos.

84’ Zhordi ndëshkohet me karton të verdhë, pas një ndërhyrje të gabuar kundër Fangajt.

80’ Doci dhe Zhordi hyjnë në fushën e lojës në vend të Vilës dhe Nani në radhët e Dinamos.

79’ Ndreca tenton nga e majta me një gjuajtje nga distanca, sfera devijohet jashtë, jo shumë larg shtyllës në të djathtë të Salit. (VIDEO)

78’ Ndreca harkon nga e majta, Sali del mirë në lojën në ajër dhe mbërthen sferën.

77’ Karton i verdhë edhe për Aleksin për protesta ndaj gjyqtarit.

76’ Fangaj ndëshkohet me karton të verdhë për protesta.

74’ Karamba i lë vendin Gudiabit në radhët e Dinamos.

69’ Ujka vendos përsëri në vështirësi Salin me një gjuajtje nga jashtë zonës, portieri grushton në këndore. (VIDEO)

67’ GOOOL EGNATIA! Kasa nga e djathta harkon në shtyllën e dytë, aty ku Ndreca me një gjuajtje fluturimthi mposht Salin. (VIDEO)

61’ Xhoel, Malotaj dhe Kasa hyjnë në fushë në vend të Zejnullait, Xhemajlit dhe Veselit në radhët e Egnatias.

58’ GOOOL DINAMO! Zabërgja nga e majta shmang Veselin e Xhemajlin, pasimi i tij në qendër gjen Nani i cili gjuan dhe çon sferën në rrjetë. (VIDEO)

57’ Nani përgjigjet në anën tjetër, me një gjuajtje nga e djathta që gjen vetëm rrjetën e jashtme të Salit.

56’ Bakajoko i shmanget fillimisht mbrojtësve por nuk ia del të gjuajë pasi bllokohet nga Dita.

53’ Momente të vazhdueshme tensioni në fushë, me lojtarët e dy skuadrave që nuk kursejnë edhe ndërhyrjet e forta.

47’ Ndreca ekzekuton një goditje dënimi ballore, por nuk gjen portën e dinamovitëve. (VIDEO)

46’ Pjesa e dytë nis më zëvendësim te Dinamo, pasi Zabërgja merr vendin e Mandelës së dëmtuar.

45’+2’ Mbyllet pjesa e parë me rezultatin 1-0 për Dinamon.

45′ Jepen 2 minuta shtesë.

41’ Pas zhvillimit të një goditje nga këndi, topi shkon te Ndreca i cili gjuan me kokë por gjen Salin të vëmendshëm në pozicion. (VIDEO)

37’ Lushkja është në pozicion të favorshëm në zonë, por nuk ia del të gjuajë, me Tolin i cili i largon sferën në momentin e duhur.

36’ Ujka vazhdon të provojë portën, këtë herë nga jashtë zonës, përsëri pa gjetur katërkëndorin. (VIDEO)

29’ Bakajoko ul topin për Ujkën në zonë, gjuajtja e këtij të fundit kalon mbi traversën e portës së Dinamos.

25’ GOOOL DINAMO! Nani gjen Mandelan i cili sheh gjuajtjen e parë të ndalet nga Dobjani, por ky i fundit nuk mund të bëjë asgjë ndaj të dytës së sulmuesit. (VIDEO)

23’ Tjetër aksion i shpejtë i Egnatias me Aleksin i cili gjuan nga jashtë zonës por nuk gjen portën.

21’ Në vijimin e një goditje nga këndi, sfera shkon te Zejnullai i cili gjuan, por la gjetur katërkëndorin.

20’ Ndreca harkon nga e majta, topi largohet nga prapavija e Dinamos.

16’ Një top i kthyer mbrapa rrezikshëm detyron Dobjanin të shkelmojë para ndërhyrjes së Mandela.

11’ Presing i lartë i Egnatias, që nuk lejon Dinamon të ndërtojë aksione sulmuese në këto minuta.

5’ Mandela përfiton nga një gabim i prapavijës së Egnatias dhe gjuan nga e majta, por nuk gjen portën. (VIDEO)

3’ Harkime radhazi në zonë nga e majta për rrogozhinasit, sfera largohet nga mbrojtja e Dinamos.

1’ Nis dueli në “Elbasan Arena”.

FORMACIONET ZYRTARE

DINAMO: Sali, Dita, Aliji, Lorran, Meksi, Toli, Karamba, Qefalija, Vila, Nani, Mandela.
Trajner: Ilir Daja

EGNATIA: Dobjani, Alijev, Xhemajli, Veseli, Fangaj, Ndreca, Aleksi, Ujka, Zejnullai, Lushkja, Bakajoko.
Trajner: Edlir Tetova

PANORAMASPORT.AL

NDIQE LIVE "PANORAMA TV"

---