Dinamo ka mposhtur Elbasanin me rezultatin 3-1. Blutë e Ilir Dajës konfirmohen “makth” i verdhebluve këtë sezon, pasi i kanë mposhtur tre herë në stadiumin “Elbasan Arena”.

Sfida për javën e 21-të të Superiores dhuroi spektakël. Dhe pse Elbasani ishte mjaft kërkues në pjesën e parë, Dinamo gjeti avantazhin në minutën e 40-të pas autogolit të Lulajt.

Emocionet e vërteta ishin ruajtur për në fraksionin e dytë. Kjo pasi u shënuan tre gola në harkun kohor të katër minutave.

Fillimisht Zabërgja dyfishoi shifrat, teksa Tsage rihapi ndeshjen. Ky takim kishte një tension të lartë në tribuna dhe pankinë.

Në fund dinamovitët shijuan fitoren, që i bashkon me kreun. Nga 37 pikë kanë Partizani, Dinamo dhe Vllaznia. Në anën tjetër Elbasani i Gvozdenoviç mbetet në vendin e pestë me 28 pikë.

REZULTATI PËRFUNDIMTAR

DINAMO 3-1 ELBASANI

40′(ag) Lulaj, 61′ Zabërgja, 65′  Mandela – 64′ Tsage

NGJARJET KRYESORE

90+4′ Mbyllet ndeshja. Dinamo fiton me rezultatin 3-1. 

90′ Akordohen 4 minuta shtesë.

88′ Qefalija largohet nga fusha, ndërsa është Vila që e zëvendëson te Dinamo.

86′ Luhen minutat e fundit ku Dinamo vazhdon të bëjë presing duke mos lejuar Elbasanin të krijojë diçka.

84′ Maliqi merr vendin e Karambës, që nuk mund të vazhdojë te Dinamo.

81′ Hoxha ndëshkohet me karton të verdhë te Dinamo.

78′ Lila provon me kokë në zonën e Dinamos. Topi përfundon jashtë. (VIDEO)

77′ Ilir Daja kryen zëvendësimin e parë të sfidës. Gudiabi aktivizohet në vendin e Tolit.

74′ Hasani merr vendin e Qoses tek Elbasani.

65′ GOOOL! Dinamo 3-1 Elbasani/ Duel i çmendur në Elbasan. Mandela fillimisht përfiton nga gabimi në mbrojtjen verdheblu. Dhe po ai dërgon topin në rrjetë. (VIDEO)

63′ GOOOL! Dinamo 2-1 Elbasani/ Tsage rihap sfidën. Sulmuesi i Elbasanit mposht portierin Teqja, teksa ka tension në tribuna. (VIDEO)

61′ GOOOL! Dinamo 2-0 Elbasani/ Zabërgja tund rrjetën e Elbasanit, pas një kundësulmi fantastik. Sulmuesi i Dinamos feston me Ilir Dajën. (VIDEO)

60′ Karton i verdhë për Olberkis tek Elbasani, që shkakton faull.

56′ Zëvendësim tjetër nga Gvozdenoviç. Gava i merr vendin Hakajt.

53′ Mungojnë rastet e pjesës së parë dhe pse Elbasani është kërkues për barazimin.

46′ Nis pjesa e dytë. Arsen Kasa merr vendin e Gjonit, që u fut nga stoli në 45 minutat e para.

45+4′ Mbyllet pjesa e parë me rezultatin 1-0 për Dinamon. 

45+2′ Karton i verdhë për Alijin që e pëson nga protestat.

45′ Akordohen 4 minuta shtesë.

40′ GOOOL! Dinamo 1-0 Elbasani/ Dinamo kalon në avantazh. Është Abalora që nuk largon si duhet, teksa topi përfundon te Lulaj që shkakton autogol. (VIDEO)

30′ Mandela lëviz bukur në zonën e Elbasanit. Mbrojtja verdheblu largon topin në këndore. (VIDEO)

25′ Karton i verdhë për Meksin, që shkakton faull.

21’ Teqja largon topin, që u godit nga këndorja. Portieri i Dinamos dëmtohet gjatë kësaj ndërhyrje, ku devijoi një top që do të gjente rrjetën. (VIDEO)

20’ Arsen Kasa provon të shënojë supergol. Teqja i mohon gjithçka. (VIDEO)

18’ Portieri Teqja mbyll krosimin e Gjonit në zonë. Topi vendoset në kontrollin e Dinamos. (VIDEO)

12′ Ndërhyrje e Lilës ndaj Zabërgjas. Gjithçka konsiderohet e rregullt. (VIDEO)

11′ Rast i rrezikshëm te Dinamo. Hakaj devijon në këndore. (VIDEO)

10′ Gjoni merr vendin e Lleshit të dëmtuar tek Elbasani.

7′ Tension mes Ilir Dajës që drejtohet nga pankina kundërshtare. Lleshi ndërkohë lë fushën e lojës. (VIDEO)

5′ Lleshi ka nevojë për ndihmën e stafit mjekësor pas ndërhyrjes së gabuar ndaj tij. Sulmuesi i momentit te Elbasani nuk mund të vazhdojë. (VIDEO)

2′ Goditja e parë nuk gjen kuadratin. Provon Qefalija te Dinamo. Më pas Abalora gabon në pasimin e tij, teksa nis nga fundorja. Detyrohet të presë një goditje në portën e tij. (VIDEO)

1′ Nis ndeshja në Elbasan.

FORMACIONET ZYRTARE

Dinamo: Teqja, Zabërgja, Mandela, Karamba, Nani, Qefalija, Hoxha, Meksi, Aliji, Loran, Toli

Trajner: Ilir Daja

Elbasani: Abalora, Olberkis, Lulaj, Dros, Tsage, Ibrahim, Kasa, Lleshi, Hakaj, Qose, Lila

Trajner: Ivan Gvozdenoviç

PANORAMASPORT.AL

NDIQE LIVE "PANORAMA TV"

---