Elbasani ka mposhtur Bylisin me rezultatin 3-1 në stadiumin “Elbasan Arena”. Një sfidë e cila u vendos me përmbysje, pasi të parët kaluan ballshiotët në avantazh.

Dhe pse me një lojtar më pak pas daljes me karton të kuq të kapitenit Abazaj në minutën e 31-të, skuadra e Dedes befasoi në fundin e pjesës së parë duke zhbllokuar sfidën me Malomon.

Djemtë e drejtuar nga Bordin reaguan në pjesën e dytë. Fillimisht ishte Kasa që barazoi takimin me një goditje spektakolare nga jashtë zone.

Heroi i takimit për Elbasanin ndërkohë rezultoi Lleshi, që u fut nga stoli. Kjo pasi realizoi dy gola, të cilët erdhën nga gabimet në mbrojtjen mike.

Kështu Elbasani rikthehet te fitorja pas tetë ndeshjesh në kampionat. Ishte pikërisht transferta e Bylisit që sillte 3 pikë, që tashmë fitohen dhe në Elbasan. Bylisi ndodhet në vendin e fundit me 13 pikë, ndërsa Elbasani mban vendin e pestë me 21 pikë pas 16 javësh kampionat.

REZULTATI PËRFUNDIMTAR

ELBASANI 3-1 BYLIS

54′ Kasa, 65′, 90+6 Lleshi – 45+4′ Malomo 

NGJARJET KRYESORE

90+8’ Mbyllet ndeshja me fitoren 3 me 1 të Elbasanit.

90+6’ GOOOL! Elbasani 3-1 Bylis/ Sërish gabim në mbrojtjen e Bylisit. Lleshi përfiton në fund duke vulosur takimin dhe po ashtu plotëson dopietën personale. (VIDEO)

90+5’ Sërish Bylisi rrezikshëm. Një goditje këndi shfrytëzohet në zonën e Elbasanit, megjithatë goditja e Përgjonit përfundon jashtë. (VIDEO)

90+3’ Treni i afrohet golit të barazimit te Bylisi. Sulmuesi i ballshiotëve lëviz mirë në zonën kundërshtare, teksa në fund shënjestra nuk është e duhura. (VIDEO)

90+2′ Mbyllet sfida për Hakajn, që i lë vendin Kasës.

90′ Akordohen 8 minuta shtesë.

89′ Bylisi provon me krosimet nga goditjet e dënimit, që vijnë në mesfushë. Abalora qëndron i pashqetësuar.

85’ Treni aktivizohet dhe Gjata lë fushën e lojës te skuadra ballshiote.

85’ Faull dhe karton i verdhë për Halilin, që sapo është futur në fushë.

84’ Largohet nga fusha Qose dhe vendin e tij e merr Halili tek Elbasani.

83’ Elbasani shfrytëzon superioritetin numerik dhe atë në rezultat. Verdheblutë qëndrojnë në mesfushën e tyre duke mos lënë hapësira për ballshiotët.

77’ Sulovari rrezikon të marrë kartonin e dytë të verdhë pasi shkakton faull. (VIDEO)

76′ Bylisi provon të fitojë metra në mesfushën e Elbasanit.

73′ Gjata nuk shfrytëzon si duhet një rast pranë zonës së Elbasanit. Kontrollon gjithçka reparti difensiv i Elbasanit.

73′ Ualison merr vendin e Markut te Bylisit. Tek Elbasani u largua Gjoni për Leo Melon.

68′ Karton i verdhë për Sulovarin pas faullit ndaj Lilës.

66′ Sulovari merr vendin e Malomos te Bylisi.

64′ GOOOL! Elbasani 2-1 Bylis/ Vendasit realizojnë golin e përmbysjes së rezultatit. Gabim i pafalshëm nga Marku që humbet topin në mbrojtje. Lleshi nuk fal dhe realizon. (VIDEO)

60′ Bruno Lulaj ka nevojë për ndihmën e stafit mjekësor pas një faulli të fituar. (VIDEO)

55′ Elbasani merr zemër nga goli dhe provon të mbajë ritmin në mesfushën e Bylisit.

54′ GOOOL! Elbasani 1-1 Bylis/ Arsen Kasa shënon një gol spektakolar. Goditja e tij nga distanca nuk pritet nga Hasanbelli, i cili devijon në rrjetë dhe sheh me keqardhje Elbasanin të gjejë barazimin. (VIDEO)

51′ Peralta fiton faull të shkaktuar nga Lulaj që ndëshkohet me karton të verdhë.

46′ Arsen Lleshi provon me gjuajtje diagonale. Hasanbelli pret në dy kohë me vështirësi. (VIDEO)

46′ Nis pjesa e dytë. Ka dy zëvendësime nga Bordin. Lleshi merr vendin e Tsague, ndërsa Greca të Dros.

45+6′ Mbyllet pjesa e parë me avantazhin 0 me 1 të Bylisit.

45+4′ GOOOL! Elbasani 0-1 Bylis/ Ballshiotët gjejnë golin me Malomon pas disa kombinimeve perfekte në mesfushën e verdhebluve. Abalora nuk mund të bënte asgjë, teksa goditja e Malomos në fund gjeti cepin e portës. (VIDEO)

45′ Akordohen 5 minuta shtesë.

42′ Hasanbelli luan rolin e heroit. Musta devijoi me kokë krosimin e Hakajt dhe portieri i Bylisit largoi topin. Rast i artë për Elbasanin. (VIDEO)

42′ Rrezikon Peralta me një faull ndaj Lajthisë, ndërsa e ka një karton të verdhë. (VIDEO)

40′ Kristian Dros gjen vetëm rrjetën e jashtme. Mesfushori i Elbasanit provoi me goditje brenda zonës, pasi topi ishte harkuar nga goditja e këndit dhe u devijua. (VIDEO)

39′ Elbasani tregohet më i nxituar në nisjet e aksioneve duke qenë me një lojtar më tepër. Mbrojtja e Bylisit tregohet e vendosur dhe nuk lejon finalizimin e rasteve.

33′ Peralta ndëshkohet me karton të verdhë nga Bylisi.

29′-32′ Abalora nis një top në mesfushën e Bylisit. Gjoni devijon me kokë, ndërsa Abazaj ndërpret topin që do të shkonte te Tsague. Kapiteni i Bylisit fillimisht merr karton të verdhë nga Bastari. VAR ndërhyn dhe pas rishikimit, kryesori jep karton të kuq për Abazajn. (VIDEO)

26′ Përgjoni nuk shfrytëzon si duhet një mundësi të krijuar pasi Musta gaboi në pasim. Goditja e lojtarit të Bylisit kontrollohet pa problem nga Abalora. (VIDEO)

22′ Esin Hakaj ka nevojë për ndihmë mjekësore pasi mori një goditje nga Kamara. (VIDEO)

17’ Elbasani vazhdon të kontrollojë lojën në shtëpi. Ende rezultati i barabartë pa gola, ndërsa mungojnë rastet e pastra.

9’ Elbasani shfaqet nën kontrollin e lojës këto minuta të para. Goditje dënimi në distancë dhe verdheblutë provojnë me skemë, por pa krijuar rrezikshmëri.

6’ Gjoni ka pretendime për faull. Gjyqtari Bastari vazhdon lojën, pasi e sheh çdo gjë të rregullt. VAR merr 1 minutë për rishikimin e rastit dhe gjithçka vazhdon normalisht. (VIDEO)

5’ Gjoni tregohet kërkues në krahun e majtë të sulmit verdheblu. Pasi shkon pranë fundores pason për Lajthinë, goditja e të cilit devijohet nga mbrojtja. Hasanbelli kontrollon pa problem. (VIDEO)

1′ Nis ndeshja në “Elbasan Arena”.

FORMACIONET ZYRTARE

Elbasani: Abalora, Hakaj, Lulaj, Lila, Musta, A. Kasa, Lajthia, Dros, Qose, Gjoni, Tsage

Trajner: Roberto Bordin

Bylis: Hasanbelli, Marku, Abazaj, Bruno, Kamara, Ofori, Përgjoni, Malomo, Peralta, Treni, Ruçi

Trajner: Nevil Dede

PANORAMASPORT.AL

NDIQE LIVE "PANORAMA TV"

---