Një gol i Albers Kekos i ka mjaftuar Partizanit që të sigurojë tre pikët në duelin kundër Laçit, për të vazhduar kryesimin i vetëm në kreun e renditjes së Superiores.

Të kuqtë kanë triumfuar pas një ndeshje me dy fytyra, ku në pjesën e parë ishin kurbinasit dominues të pafat, teksa panë t’u anulohej edhe një gol fantastik i Manellarit për pozicion jashtë loje, teksa detyruan shpesh Qirkon të bënte ndërhyrje vendimtare.

Në pjesën e dytë, loja e të kuqve ndryshoi dhe trysnia e vazhdueshme para portës së Dajsinanit, solli edhe golin e Kekos. Më pas ishte Laçi që mori kontrollin e lojës, por me Partizanin që krijoi rastet më të mira duke detyruar Dajsinanin të bënte mrekulli për të mbajtur ekipin në lojë.,

Në fund, ai gol mjaftoi për tre pikët, që vazhdojnë pathyeshmërinë e Veselinoviç në kampionatin shqiptar, ndërsa ndalin ecurinë pozitive të kurbinasve që kur drejtimin e kishte marrë Moriero.

PARTIZANI-LAÇI 1-0
57′ Keko

NGJARJET KRYESORE

90’+7’ Mbyllet ndeshja me fitoren 1-0 të Partizanit.

90’+3’ Bintsuka merr vendin e Rrapajt në radhët e të kuqve.

90’+1’ Keko dhe Melo ndëshkohen me të verdhë pas një përplasje mes dy lojtarëve.

90’ Jepen 5 minuta shtesë.

88’ Boçka dhe Bullari hyjnë në fushë në vend të Mjakit dhe Pepës në radhët e Laçit.

86’ Përsëri Dajsinani është i pakalueshëm teksa ndal një gjuajtje të Mba pak hapa larg portës. (VIDEO)

85’ Pas zhvillimit të një goditje dënimi, Ismaili gjuan drejt portës por gjen përgjigjen fantastike të Dajsinanit. (VIDEO)

85’ Prodani ndëshkohet me karton të verdhë.

84’ Shanaj nga e djathta lëshon një gjuajtje të fortë, Dajsinani grushton në pozicion në shtyllën e parë.

83’ Gabim i pabesueshëm nga Rrapaj para portës, kur Mba e nxjerr të vetëm para Dajsinanit. Kapiteni i të kuqve gjuan në trupin e portierit dhe jo në portë. (VIDEO)

81’ Ballhysa dhe Bibo hyjnë në fushë në vend të Traore dhe Tresës për kurbinasit. Nga ana tjetër është Sembene i cili merr vendin e Buxhelajt të dëmtuar.

77’ Mjaki nga e djathta pason në qendër, Domgjoni largon sferën në fundore. (VIDEO)

71’ Manellari mundohet të gjejë rrjetën me një gjuajtje nga distanca, sfera shkon larg portës së të kuqve.

70’ Zeka i lë vendin Shanajt në radhët e Partizanit.

64’ Keko dhe Rrapaj kombinojnë brenda zonës së Laçit, por nuk ia dalin të gjuajnë në portën e Dajsinanit.

59’ Mundësi e mirë e Mba për të dyfishuar shifrat, por ai gabon kontrollin në zonë dhe sfera shkon te Dajsinani.

58’ Traore merr vendin e Kofi te Laçi

57’ GOOOL PARTIZANI! Pas një harkimi në zonë nga e majta, Zeka me kokë godet shtyllën e pastaj topi shkon te Keko i cili me një diagonale gjen rrjetën. (VIDEO)

52’ Pas një goditje nga këndi, Mba gjuan me kokë dhe traversa është ajo që shpëton kurbinasit. (VIDEO)

49’ Të kuqtë gjejnë rrugën e rrjetës me anë të Kekos i cili shtyn topin në rrjetë pas një aksioni në të djathtën. Por gjithçka bëhet e pavlefshme nga pozicioni jashtë loje i sulmuesit. (VIDEO)

46’ Nis pjesa e dytë e ndeshjes pa zëvendësime.

45’+3’ Mbyllet pa gola pjesa e parë.  

45’+2’ Në zhvillimin e një goditje këndi, Keko devijon me kokë në shtyllën e parë drejt asaj të largët, pa gjetur katërkëndorin. (VIDEO)

45’+1’ Zeka niset në kundërsulm duke kaluar dy lojtarë, por në fund gabon pasimin për Rrapajn i cili ishte në pozicion të favorshëm për të gjuajtur.

45′ Jepen 3 minuta shtesë.

42’ Papa harkon në zonë nga e djathta, topi shkon rrezikshëm drejt portës dhe detyron Qirkon ta grushtojë sferën mbi traversë.

33’ Rrapaj merr topin në zonë në të majtën, rrotullohet dhe gjuan në shtyllën e parë, ku Dajsinani është i vëmendshëm.  (VIDEO)

30’ Tresa gjuan nga ana tjetër nga distanca, sfera shkon direkt te Qirko.

28’ Rrapaj provon të gjejë hapësirë dhe të gjuajë, tentativa e tij shkon jashtë katërkëndorit.

25’ Në zhvillimin e goditjes nga këndi, topi shkon te Mjaki i cili gjuan me forcë nga jashtë zonës, duke gjetur përsëri përgjigjen e Qirkos. (VIDEO)

24’ Kofi shfaqet i vetëm në të djathtë të sulmit, gjuajtja e tij ndalet nga Qirko i cili e devijon në këndore. (VIDEO)

23’ Duel mes Mba dhe Lleshit për një top të nisur drejt zonës kurbinase, gjyqtari akordon faull në sulm për të kuqtë. (VIDEO)

20’ Kofi rrëzohet pas një kontakti në hyrje të zonës, por për gjyqtarin Bylykbashi nuk ka asgjë. (VIDEO)

13’ Zeka tenton të gjejë golin me një gjuajtje me të majtën nga distanca, topi shkon në duart e Dajsinanit. (VIDEO)

11’ Kofi depërton mes futbollistëve të Partizanit duke iu afruar portës, derisa ndalet nga prapavija vetëm pak hapa larg Qirkos.

10’ Partizani provon me disa harkime drejt zonës, teksa fiton 2 goditje këndi radhazi, por pa sjellë rrezik konkret në katërkëndorin e Dajsinanit.

6’ Një harkim nga e djathta e sulmit të Laçit, sjell goditjen me kokë të Kofi në qendër por Qirko këtë herë mbërthen sferën.

2’ Aksion spektakolar i kurbinasve me shumë pasime, teksa është Manellari në fund i cili finalizon me një gjuajtje fantastike nga jashtë zonës. Por goli më pas anulohet për një pozicion jashtë loje të Prodanit gjatë aksionit. (VIDEO)

1’ Nis dueli në “Arenën e Demave”.

FORMACIONET ZYRTARE

PARTIZANI: Qirko, Bytyçi, Ismaili, Keko, Zeka, Kote, Preka, Buxhelaj, Domgjoni, Mba, Rrapaj

Trajner: Aleksandër Veselinoviç

LAÇI: Dajsinani, Kurti, Lleshi, Tresa, Kofi, Manellari, Prodani, Kordeiro, Mjaki, Opeh, Papa

Trajner: Françesko Moriero

PANORAMASPORT.AL

NDIQE LIVE "PANORAMA TV"

---