Dinamo ka marrë një fitore shumë të rëndësishme në një ndeshje të mbyllur në mënyrë dramatike me shifrat 3-2 në “Loro Boriçi” përballë Vllaznisë vendase.

Blutë zhvilluan një ndeshje thuajse perfekte, duke dominuar përballë shkodranëve që ishin të paqartë në çdo repart me veprimet e tyre. Goli spektakolar i Zabërgjës ishte ai që i dha avantazhin bluve, ndërsa më pas Nani me një kundërzbritje të shpejtë dyfishoi shifrat para pushimit. Një tjetër gol i Nani në pjesën e dytë bëri që ndeshja të dukej e mbyllur teksa Qarri dhe shtylla shmangën katastrofën për kuqeblutë të cilët u përballën edhe me kontestimin e tifozëve të tyre në “Loro Boriçi”.

Por fundi i ndeshjes u bë dramatik. Fillimisht i riu Spahija nisi Çobën drejt portës për të shënuar golin që shkurtoi diferencën në minutën e 87. Më pas ishte vetë mbrojtësi ai i cili dy minuta më vonë tundi rrjetën për të bërë hapur përsëri këtë ndeshje për kuqeblutë. Por tentativat e këtyre të fundit për të gjetur golin e mrekullisë, nuk ishin rezultative e në fund ishte Dinamo që mori tre pikë mëse të merituara për atë që bëri thuajse gjatë gjithë këtij takimi.

VLLAZNIA-DINAMO 2-3
87′ Çoba, 89′ Spahija / 28′ Zabërgja, 43′, 53′ Nani

NGJARJET KRYESORE

90’+5’ Mbyllet ndeshja me fitoren 3-2 të Dinamos.

90’+2’ Situatat zhvendosen sa në një gjysmëfushë në tjetrën, gjithçka e hapur në fundin e sfidës.

90’ Jepen 4 minuta shtesë.

89’ GOOOL VLLAZNIA! Tjetër gol i kuqebluve, pas një goditje këndi është Spahija i cili tund rrjetën. (VIDEO)

87’ GOOOL VLLAZNIA! Spahija nis Çobën në të majtën dhe ky i fundit hyn në zonë dhe mposht Salin duke shkurtuar diferencën. (VIDEO)

83’ Një tjetër zbritje e shpejtë e Zabërgjës, Juriç me vështirësi çon topin në këndore.

82’ Zhordi merr vendin e Nani në fushën e lojës te Dinamo.

80’ Bajrami i dëmtuar i lë vendin në fushë Pusit te Vllaznia.

78’ Meksi gjuan në të djathtën, sfera ndalet nga shtylla she shkon te Vila, gjuajtja e të cilit bllokohet nga mbrojtja e kuqebluve. (VIDEO)

77’ Toli provon nga jashtë zonës, Spahija bllokon goditjen e tij.

73; Mala ndëshkohet me karton të verdhë për protesta.

71’ Karamba niset në kundërsulm të shpejtë drejt portës kuqeblu, gjuajtja e tij ndalet nga Qarri i cili shmang golin e radhës. (VIDEO)

70’ Spahija merr vendin e Deliut te Vllaznia.

69’ Në goditjen nga këndi të radhës, Zabërgja gjuan fluturimthi por pa gjetur katërkëndorin. (VIDEO)

69’ Nani provon golin direkt nga këndorja, Qarri devijon sferën jashtë.

68’ Përsëri panik në zonën e Vllaznisë, pas një goditje këndi është Juriç i cili me vështirësi largon përsëri në këndore.

63’ Bajrami gabon dhe Nani përfiton duke u shfaqur në zonë, gjuajtja e tij këtë herë kalon mbi traversën e portës së Qarrit. (VIDEO)

62’ Gudiabi i lë vendin në fushë Qefaliajt në radhët e Dinamos.

61’ Jago dhe Dodaj largohen nga fusha e lojës, duke i bërë vend Çobës dhe Delajt në radhët e Vllaznisë.

59’ Mala harkon një goditje dënimi në zonë, Gudiabi dy herë me kokë largon topin.

53’ GOOOL DINAMO! Tjetër aksion i shpejtë në të djathtën i Nani i cili hyn në zonë dhe mposht Qarrin duke thelluar diferencën. (VIDEO)

51’ Qato provon portën në kufijtë e zonës, sfera devijohet mbi traversë.

50’ Juriç i dhuron në mënyrë të pakuptueshme një goditje këndi bluve. (VIDEO)

46’ Vllaznia nis pjesën e dytë me zëvendësim, duke aktivizuar Krymin në vend të Kahrimanoviç.

45’+2’ Mbyllet pjesa e parë me shifrat 2-0 në favor të Dinamos.

45’+1’ Dodaj tenton me një kthesë në zonë, shumë e lehtë për të shqetësuar Salin.

45’ Jepen 2 minuta shtesë.

43’ GOOOL DINAMO! Kahrimanoviç humb topin në mesfushë, Zabërgja nis kundërsulmin dhe pason për Nani i cili nga e djathta lëshon një predhë që nuk ndalet dot nga Qarri. (VIDEO)

35’ Jago tenton portën nga e majta me një gjuajtje në kufijtë e zonës, nuk ia del të kalojë mbrojtjen e bluve.

31’ Mundohet të reagojë Vllaznia, e cila shtyn përsëri lojën drejt gjysmëfushës kundërshtare, por me gabime të shumta në pasimet pranë zonës.

28’ GOOOL DINAMO! Vila pason për Zabërgjën i cili nga e majta hyn në zonë dhe lëshon një gjuajtje të pakapshme në shtyllën e largët. (VIDEO)

25’ Rast i artë për Dinamon, pasi Zabërgja i pason Vilës në pozicion gjuajtje, por tentativa e këtij të fundit bllokohet nga Qarri. (VIDEO)

19’ Balaj ka mundësinë të gjuajë, por tentativa e tij bllokohet nga një mbrojtës i Dinamos.

17’ Përgjigjet Dinamo me një sulm të shpejtë të Zabërgjës, diagonalja e të cilit nuk gjen portën e kuqebluve.

13’ Protesta të shkodranëve për një tjetër faull ndaj Malës, këtë herë nga Aliji, por që nuk u sanksionua nga gjyqtari. (VIDEO)

11’ Dodaj gjen hapësirë dhe provon nga distanca, sfera shkon jashtë, jo shumë larg portës së bluve. (VIDEO)

9’ Gudiabi ndëshkohet me karton të verdhë pas një faulli ndaj Malës..

8’ Meksi nga e djathta harkon në shtyllën e dytë, Sala largon topin me shpejtësi.

6’ Presing i lartë i shkodranëve, të cilët fitojnë topin në gjysmëfushën kundërshtare, por harkimet në zonë nuk rrezikojnë Salin.

1’ Nis dueli në “Loro Boriçi”.

FORMACIONET ZYRTARE

VLLAZNIA: Qarri, Juriç, Bajrami, Jago, Sala, Deliu, Qato, Kahrimanoviç, Mala, Dodaj, Balaj.
Trajner: Thomas Brdariç

DINAMO: Sali, Aliji, Dita, Meksi, Lorran, Toli, Gudiabi, Karamba, Vila, Nani, Zabërgja,
Trajner: Ilir Daja

PANORAMASPORT.AL

NDIQE LIVE "PANORAMA TV"

---