Luftëtari e mbylli fazën e parë në krye të Grupit B, por ekipi do të përforcohen edhe në merkaton e dimrit, në mënyrë që të mos vihet në dyshim ngjitja në Kategorinë e Parë. Sulmuesi Stefan Agu është afrimi i parë i merkatos së gjirokastritëve. 21-vjeçari nigerian në pjesën e parë të sezonit ka qenë pjesë e Butrintit. Në ekipin e Luftëtarit bëjnë pjesë edhe vëllezërit Stivi dhe Thoma Puci.

Më i vogli, Thomai 18 vjeç, luan sezonin e dytë, por ndryshe nga një vit më parë është titullar në skuadër. Luan në repartin e mesfushës duke marrë në shumë ndeshje rolin e organizatorit. Për “Panorama Sport”, Thoma Puci u shpreh: “Mbyllëm një fazë të parë të mirë dhe mendoj se jemi në rrugën e duhur për ta bërë realitet objektivin që kemi marrë, ngjitjen në Kategorinë e Parë. Kishim mundësi që diferencën në klasifikim me vendin e dytë ta kishim më shumë sesa dy pikë. E mbyllëm këtë fazë në vendin e parë, por kishim mundësi të kishim pikët e plota.

Një humbje dhe një barazim edhe mund t’i evitonim, por besoj se në vazhdim nuk do të zbresim nga vendi i parë në grup. Jemi ekipi që kemi shënuar shumë gola dhe kjo tregon se janë të gjitha mundësitë të dalim fitues ndaj skuadrave të tjera. Loja jonë ka ardhur duke u përmirësuar dhe na duhet ta mbajmë këtë ritëm. Pas disa ditësh pushim, në ditët e para të janarit nisim përgatitjet, duke i kushtuar stërvitjes me të njëjtin motivim si në javët e kampionatit. Deri më 26 janar, kur fillon faza e dytë, kemi kohë mjaftueshëm të përgatitemi për të mbajtur po atë ritëm loje, me të cilin përmbyllëm fazën e parë”.

GËZIM BEQIRI – PANORAMASPORT.AL

NDIQE LIVE "PANORAMA TV"

---