Humbja e Valbonës në shtëpi me Pogradecin ka venitur shumë shpresat e tropojanëve për mbijetesën në Kategorinë e Parë. Morali i lojtarëve ka rënë, kur sheh tabelën dhe diferencën 7-8 pikëshe me dy ekipet më të afërta, Korabi dhe Kukësi.

Duke ditur se në lojë janë edhe 13 ndeshje, gjithçka mund të ndodhë, por Valbonës i duhet një sforco e madhe për të arritur objektivin e mbijetesës. Për zv.trajnerin Osman Qelia, skuadra nuk dorëzohet, derisa matematika i mban gjallë shpresat. Për “Panorama Sport”, Qelia u shpreh: “Pas humbjes në shtëpi me Pogradecin, Valbonës iu ndërlikua edhe më shumë situata e mbijetesës.

Gjithsesi, kemi besim te grupi dhe nuk do të dorëzohemi përderisa kemi në dispozicion edhe 13 javë kampionat dhe mundësitë për rikuperim janë të mundshme. Ne do të luftojmë deri sa matematika të na lejojë. E dimë se kampionati ka hyrë në faza ku të gjitha skuadrat janë të angazhuara për të mbledhur pikë, por ne do të luftojmë sa të mundemi të rikuperojmë pozicionimin tonë në tabelë”.

ABDULLA DUSHKU- PANORAMASPORT.AL

NDIQE LIVE "PANORAMA TV"

---