Fitorja e fundit me Besën në Rrogozhinë mban gjallë shpresat e Apolonisë, që në fund të sezonit të jetë pjesë e “play off”–it, si mundësia e dytë për t’u ngjitur në elitë. Apolonia do të luajë nesër ndaj Valbonës, një ndeshje shtëpie dhe fitorja është detyrim.

Këtë e thotë hapur edhe mesfushori Rubin Hebeja, i cili për “Panorama Sport”, thekson se ekipi do të japë shpirtin në fushë për ta fituar ndeshjen.

Sa ju ka shërbyer pauza për t’u përmirësuar?

Na ka shërbyer për mirë në disa aspekte. Kemi pasur kohë për rikuperimet, përgatitjen me qetësi dhe rregullimin e gabimeve, si dhe rritjen e anës psikologjike. Përgatitjet kanë shkuar shumë mirë, ndaj kemi besim se këtë vit të ri do ta nisim me këmbën e mbarë.

2025-ën e nisni me Valbonën në shtëpi, si e shihni këtë ndeshje?

Një ndeshje e rëndësishme, që e kemi vlerësuar maksimalisht në të gjitha komponentët, pavarësisht se Valbona është në vendet e fundit. Është një skuadër me pak pikë, por që ka nxjerrë ndeshje të mira në transfertë. Ne do të bëjmë më të mirën, që në fund të dalim fitimtarë.

Pra, do të synoni vetëm tri pikët kundër Valbonës?

Synimi i Apolonisë është të dalë me kokën lart dhe të fitojë. E ritheksoj, do të bëjmë më të mirën dhe fitorja është detyrim. Ne duhet të dalim një herë e mirë nga zona e ftohtë, kemi nevojë për pikë, ndaj tri pikët kanë rëndësi më shumë se çdo gjë tjetër.

Duhet theksuar se Apolonia vuan me të voglat, pse ndodh kjo?

Apolonia luan futboll të bukur dhe me ekipet e forta kemi treguar që dominojmë me lojë dhe rezultat. Ndërsa me të ashtuquajturat të vogla, kemi pasur momente shpërqendrimi. Nesër duhet të jemi shumë agresivë, ndaj një kundërshtari që s’ka asgjë për t’u humbur. Ekipi po punon për objektivin madhor për t’u përmirësuar nga ndeshja në ndeshje. Sezoni është i gjatë, janë edhe shumë ndeshje për t’u luajtur. Edhe pse jemi larg dy vendeve të para, mos të harrojmë se “play off” ta mundëson këtë gjë duke qenë mundësia e dytë për t’u ngjitur në elitë.

HILMI SALIU- PANORAMASPORT.AL

 

NDIQE LIVE "PANORAMA TV"

---