Vora vijon të stërvitet rregullisht në kuadër të dy takimeve të radhës, që i kanë gjatë javës tjetër. Edhe pse kalendari u jep mundësi për ndeshje miqësore, duke qenë se kampionati është i ndërprerë këtë fundjavë, vorakët e kanë anashkaluar këtë gjë për dy arsye.

Disa prej lojtarëve të Vorës janë përfshirë në ndeshjet eliminatore të ekipeve tona kombëtare, U-19, U-21, por edhe disa të tjerë kanë qenë në dispozicion të Kombëtares së drejtuar nga trajneri Silvinjo, në mbarëvajtje të procesit stërvitor të kuqezinjve.

Së dyti, nuk duan të rrezikojnë me ndonjë dëmtim të mundshëm gjatë testit të mundshëm. Vorën e pret një sfidë e vështirë në Kukës për kampionatin, por edhe ajo e mesjavës kundër Orikut në Kupë kërkon angazhim. Seanca e djeshme stërvitore për shkak të ngarkesës së stadiumit “Vora” me ndeshjen e Kombëtares U-21, u zhvillua gjatë paradites. Trajneri Bellai po kërkon të ndërtojë dy formacione krejtësisht të ndryshme, një për Kupën dhe një për kampionat.

Argel Avdiu, një nga lojtarët më aktiv për vorakët, do të jetë i gatshëm për të luajtur në të dyja takimet që Vora ka javën tjetër. Për “Panorama Sport”, Avdiu u shpreh: “Vora do të synojë të dalë fitimtare në dy sfidat e javës tjetër. Më e rëndësishme për ne është ndeshja e kampionatit kundër Kukësit, ku kërkohet vetëm fitorja, vetëm kështu nuk i largohemi objektivit tonë, që është ngjitja direket në Superiore. Edhe Kupa ka vlerësimin tonë dhe duam të ecim sa më gjatë në këtë kompeticion”

ABDULLA DUSHKU-PANORAMASPORT.AL

NDIQE LIVE "PANORAMA TV"

---