Humbja me Vllazninë në transfertë nuk duhet të bëhet dramë në radhët e korçarëve. Ky është mendimi i Dhimitraq Xhambazit, që e sheh si një humbje që pritej ajo ndaj shkodranëve, teksa fton ekipin që të mendojë për reagimin nga ndeshja e radhës.

Sipas ish-sulmuesit të korçarëve nuk duhet të bëhet dramë një humbje në shtëpi me Partizanin me gjithë ato mungesa dhe aq më pak ndaj Vllaznisë në transfertë. Sipas tij ekipi duhet të qëndrojë i qetë dhe të mundohet të reagojë në ndeshjet e ardhshme.

Sipas Xhambazit, dy ndeshjet e fundit kanë qenë tejet të vështira për Skënderbeun, që nuk ka mundur dot të bëjë më shumë edhe për shkak të rrethanave se si janë zhvilluar këto takime.

“E drejtë që vijmë nga dy humbje dhe si gjithmonë humbjet nuk janë të lehta për t’u kapërdirë, por duhet të kemi parasysh se luanim përballë dy ekipeve që janë në krye të klasifikimit në këtë sezon. Luajtëm kundër Partizanit dhe me një ekip te përgjysmuar nga mungesat. Përtej faktit që thuhet se kemi 25 lojtarë ne duhet të pranojmë se nuk kemi 25 lojtarë të një niveli dhe mungesat na venë në pozicion të vështirë. Më pas luajtëm ne Shkodër në një tjetër ndeshje të vështirë.

Ndaj unë nuk shoh dramë për të thënë se ekipi është në krizë. Jemi në një moment jo të mirë në renditje dhe kjo është fakt por skuadra ka mundësinë që të bëjë gjithçka mirë në ndeshjet e ardhshme. Po të shikojmë qetësisht diferencat mes ekipeve janë shumë të vogla. Jo vetëm në cilësitë që kanë në ekip, por edhe në klasifikim.

Ndaj edhe për këtë mendoj se nuk jemi në kushtet kur duhet të bien “sirenat” e alarmit. Është një situatë që duhet përballuar me qetësi dhe maturi, pasi ndeshje ka plot dhe ka shumë pikë në lojë. Duhet të jemi të qetë që të dalim nga kjo situatë e vështirë në renditje, por jo aq e vështirë nëse shohim situatën e kampionatit në tërësi dhe grupin që ka ky ekip”, theksoi fillimisht Xhambazi duke mos e bërë dramë humbjen e fundit të korçarëve.

REAGIMI- Sipas Xhambazit në kushtet në të cilat ndodhet ekipi në kampionat reagimi është ai që presin të gjithë. Ndaj edhe për këtë për ishsulmuesin duhet që nga ndeshja e radhës në Durrës ekipi të tregojë vlerat dhe të kthehet tek rezultatet pozitive.

“Jemi në një moment që duhet qetësi dhe mbi të gjitha motiv për të reaguar. Kemi një tjetër transfertë në Durrës dhe jam i bindur se ekipi do të dijë të reagojë. E them këtë, pasi kemi cilësi, por nuk duhet të shohim çdo ndeshje si tre pikë të mundshme. Është koha që të grumbullojmë pikë dhe një pikë në ndeshje të caktuara nuk është një rezultat i keq.

Duhet që ekipi të jetë i bashkuar dhe i përqendruar. Kemi fat që trajneri është një person i qetë dhe që di të motivojë lojtarët. Këtë duhet ta shfrytëzojmë në maksimum. Jam i bindur se do të reagojmë dhe kjo fazë do të jetë më e mirë sesa faza e parë e kampionatit”, theksoi Dhimitraq Xhambazi.

LLAZI SARO – PANORAMASPORT.AL

NDIQE LIVE "PANORAMA TV"

---