Dushan Vlahoviçi është duke përjetuar një moment jo fort të mirë te Juventusi. Gjesti që bëri në sfidën ndaj Monzës kur u zëvendësua, duke treguar gjithë acarimin e tij, është vetëm veprimi i fundit i këtij sezoni.

Vlahoviç reagoi ashpër në momentin që u ul në stol dhe kjo tregon se situata e sulmuesit serb po karakterizohet nga një nervozizëm i madh, duke parë se ka ende edhe një çështje shumë të rëndësishme për të zgjidhur, rinovimin. Sa i përket fushës, Vlahoviçi vazhdon të tregojë impenjim dhe dedikim të madh ndaj fanellës, por në sfidat e fundit ka pasur raste ku nuk ka qenë në pritshmëritë që te Juventusi kanë për të, si në planin teknik dhe atë të realizimit.

SITUATAT

Ecuria e Vlahoviçit ka pasur shumë ulje dhe ngritje, sidomos pas sfidës ndaj Venecias ku edhe debatoi me tifozët bardhezi. Megjithatë, kjo situatë u tejkalua, me të dyja palët që rivendosën raporte të mira. Megjithatë, kjo gjë nuk ka mjaftuar që Vlahoviçi të largojë kritikat, ndërsa nga ana tjetër Mota përpiqet ta qetësojë.

“Vlahoviçi nervoz? Dushani ka bërë që ndeshje të madhe dhe jam shumë i lumtur për atë që ka bërë”, u shpreh Mota pas triumfit kundër Monzës duke ulur presionin ndaj sulmuesit. Megjithatë, pavarësisht konfirmimeve, e ardhmja mbetet pezull edhe pse Xhuntoli është shprehur se do të vijë pas merkatos së janarit.

“Raportet tona me djalin dhe agjentët e tij janë shumë të mira. Ne kemi vendosur që të takohemi pas merkatos së janarit. Duke parë se ka ende një vit kontratë, kemi mjaftueshëm kohë për të sistemuar gjërat dhe për të vazhduar së bashku në mënyrën më të mirë të mundshme”, tha Xhuntoli.

Por pavarësisht gjithë këtyre deklaratave, e ardhmja mbetet pezull, performancat janë me ulje dhe ngritje dhe Vlahoviç po kalon një moment jo të mirë.

PANORAMASPORT.AL

NDIQE LIVE "PANORAMA TV"

---