Nevil Dede beson te skuadra fituese kundër Skënderbeut, ja formacioni i mundshëm i Bylisit
Ballshiotët dhe trajneri Nevil Dede pritet që t’i besojnë skuadrës së javëve të fundit edhe për atë se nuk ka munguar sidomos loja e mirë, që jep shpresë edhe për rezultate pozitive.
Në Ballsh po mendojnë që as në Korçë të mos bëjnë lëvizje, për më tepër që është i tërë kontingjenti në stërvitje, madje nuk ka të dëmtuar apo të pezulluar. Do të jenë gati edhe Abazaj e Sulovari, dy forca më shumë në një transfertë kaq të rëndësishme. Ndoshta ndonjë balotazh në qendër të mbrojtjes, por kjo do të vendoset deri pak orë para sfidës në Korçë.
Bylisi pritet që në transfertën korçare të ketë edhe tifozët me vete. Ata do të jenë në mbështetje të skuadrës se tyre të zemrës, duke shpresuar që të ndihmojnë në suksesin e radhës. Ballshiotët duket se javët e fundit me lojën dhe rezultatet kanë rritur shpresat për të lënë zonën e fundit të renditjes.
ERJON SALIU-PANORAMASPORT.AL
